Border News Agency
အီရန်၊ မေ ၅။
ဟော်မုဇ်ရေလက်ကြားကို ဖြတ်သန်းဖို့ ကြိုးစားတဲ့ အမေရိကန်စစ်သင်္ဘောတစင်းကို ဒုံးကျည်နှစ်စင်းနဲ့ ပစ်ခတ်တိုက်ခိုက်ခဲ့တာကြောင့် အဲဒီသင်္ဘောဟာ ဆုတ်ခွာထွက်ပြေးသွားခဲ့ရတယ်လို့ အီရန်ဘက်က ထုတ်ပြန်ပါတယ်။
အီရန်တော်လှန်ရေးအစောင့်တပ် (IRGC) နဲ့ နီးစပ်တဲ့ Fars သတင်းဌာနရဲ့ ဖော်ပြချက်အရ အမေရိကန်စစ်သင်္ဘောဟာ အီရန်ပိုင် ဂျာ့ခ် ဆိပ်ကမ်းအနီးမှာ သတိပေးချက်တွေကို လျစ်လျူရှုခဲ့တာကြောင့် ပစ်ခတ်ခံရတာဖြစ်ပြီး အဲဒီနောက်မှာတော့ ရေလက်ကြားအတွင်းကနေ ထွက်ပြေးသွားခဲ့တယ်လို့ ဆိုပါတယ်။
အီရန်စစ်ဘက်ခေါင်းဆောင်တွေကတော့ အမေရိကန်သမ္မတ ဒေါ်နယ်ထရမ့်ရဲ့ သင်္ဘောတွေကို လမ်းညွှန်ပေးမယ်ဆိုတဲ့ အစီအစဉ်အပေါ် တုံ့ပြန်တဲ့အနေနဲ့ သူတို့ရဲ့ ရေပိုင်နက်လုံခြုံရေးကို အစွမ်းကုန် ကာကွယ်သွားမှာဖြစ်ပြီး ကျူးကျော်လာရင် တိုက်ခိုက်သွားမယ်လို့ ပြင်းပြင်းထန်ထန် သတိပေးထားပါတယ်။
ဒါပေမယ့် အမေရိကန်စစ်တပ်ဘက်ကတော့ ဒီပစ်ခတ်မှုသတင်းဟာ မဟုတ်မှန်ကြောင်းနဲ့ သူတို့ရဲ့ သင်္ဘောတစင်းမှ ထိခိုက်မှုမရှိဘူးလို့ ဆိုရှယ်မီဒီယာကနေတဆင့် ချက်ချင်း ပြန်လည်ငြင်းဆိုထားပါတယ်။
ဝါရှင်တန်ဘက်ကတော့ ပိတ်မိနေတဲ့ ကုန်သွယ်ရေးသင်္ဘောတွေကို ဘေးကင်းစွာ ဖြတ်သန်းနိုင်ဖို့ ဆက်လက်လုပ်ဆောင်သွားမှာဖြစ်ပြီး အီရန်ရဲ့ ထုတ်ပြန်ချက်ဟာ ဝါဒဖြန့်မှုသာဖြစ်တယ်လို့ တုံ့ပြန်ထားပါတယ်။
အီရန်အစိုးရဟာ စစ်ပွဲအတွက် လူအင်အားစုဆောင်းတဲ့ အသက်ပေးလှူသူများလှုပ်ရှားမှုကို အရှိန်မြှင့်လုပ်ဆောင်နေပြီး နိုင်ငံတဝှမ်းမှာလည်း အင်တာနက်လိုင်းတွေကို ဆက်လက်ဖြတ်တောက်ထားဆဲဖြစ်ပါတယ်။
