Border News Agency
အီရန်၊ မေ ၆။
အီရန်နိုင်ငံခြားရေးဝန်ကြီး အဘတ်စ်အာရတ်ချီဟာ တရုတ်နိုင်ငံခြားရေးဝန်ကြီး ဝမ်ယိနဲ့ တွေ့ဆုံဆွေးနွေးဖို့အတွက် မေလ ၆ ရက်၊ဒီနေ့မှာ ပေကျင်းမြို့ကို ရောက်ရှိလာပါတယ်။
ဒါဟာ အမေရိကန်-အစ္စရေးနဲ့ အီရန်တို့ကြား စစ်ပွဲဖြစ်ပွားပြီးနောက်ပိုင်း အီရန်နိုင်ငံခြားရေးဝန်ကြီးရဲ့ ပထမဆုံး တရုတ်ခရီးစဉ်လည်း ဖြစ်ပါတယ်။
ဒီတွေ့ဆုံမှုဟာ လာမယ့်အပတ် မေလ ၁၄ ရက်မှာ ပြုလုပ်မယ့် သမ္မတထရမ့်နဲ့ သမ္မတရှီကျင့်ဖျင်တို့ရဲ့ ထိပ်သီးဆွေးနွေးပွဲမတိုင်ခင် တပတ်အလိုမှာ ပေါ်ပေါက်လာတာပါ။
အဓိကအားဖြင့်တော့ ဟော်မုဇ်ရေလက်ကြား ပြန်လည်ဖွင့်လှစ်ရေးနဲ့ အပစ်အခတ်ရပ်စဲရေးကို ဆက်လက်ထိန်းသိမ်းထားနိုင်ဖို့ နှစ်ဖက်ဆွေးနွေးကြမှာ ဖြစ်ပါတယ်။
တရုတ်နိုင်ငံဟာ အမေရိကန်က အီရန်ဆိပ်ကမ်းတွေကို ပိတ်ဆို့ထားတာကို ဝေဖန်နေသလို တဖက်မှာလည်း အီရန်က ဟော်မုဇ်ရေလက်ကြားကို ဆက်လက်ပိတ်ထားတာဟာ ကမ္ဘာ့စီးပွားရေးအတွက် အန္တရာယ်ရှိတယ်လို့ ယူဆနေပါတယ်။
အီရန်ဘက်ကတော့ ရေလက်ကြားပြန်ဖွင့်ရင် တရုတ်ဘက်က ဘယ်လိုအကာအကွယ်ပေးမလဲဆိုတာကို သိချင်နေတာပါ။
အခုအချိန်မှာ သမ္မတထရမ့်ကလည်း ဟော်မုဇ်ရေလက်ကြားက သင်္ဘောတွေကို လမ်းပြပေးမယ့် Project Freedomစစ်ဆင်ရေးကို ခေတ္တရပ်နားထားပါတယ်။
ပါကစ္စတန်ရဲ့ ကြားဝင်စေ့စပ်မှုကြောင့် အမေရိကန်နဲ့ အီရန်ကြား ငြိမ်းချမ်းရေး သဘောတူညီချက်ရဖို့ သိသာတဲ့ တိုးတက်မှုတွေ ရှိနေတာကြောင့် အခုလို ရပ်နားလိုက်တာလို့ ဆိုပါတယ်။
ဒါပေမယ့် တင်းမာမှုတွေကတော့ ရှိနေဆဲဖြစ်ပြီး ယူအေအီးနိုင်ငံက သူတို့ရဲ့ ရေနံချက်စက်ရုံတခု အီရန်ရဲ့ ဒုံးကျည်နဲ့ တိုက်ခိုက်ခံရတယ်လို့ စွပ်စွဲထားပါတယ်။
အီရန်ကတော့ ဒီစွပ်စွဲချက်ကို ငြင်းဆိုထားပြီး၊ လာမယ့်အပတ်မှာပြုလုပ်မယ့် တရုတ်-အမေရိကန် ထိပ်သီးဆွေးနွေးပွဲကနေ အီရန်အရေး ဘယ်လိုအဖြေထွက်လာမလဲဆိုတာက စိတ်ဝင်စားစရာ ဖြစ်နေပါတယ်။
