Border News Agency
အမေရိကန်၊ မေ ၇။
ဟော်မုဇ်ရေလက်ကြား ပြန်ဖွင့်ရေးကို အရင်ဆွေးနွေးပြီးနျူကလီးယားကိစ္စကို နောက်မှထားဖို့ဆိုတဲ့အီရန်ရဲ့ တောင်းဆိုချက်ကို အမေရိကန်ဘက်က လက်ခံဖို့ ရှိနေပါတယ်။
အီရန်နဲ့ စစ်ပွဲကို အဆုံးသတ်ဖို့အတွက် နားလည်မှုစာချွန်လွှာ (MoU) လက်မှတ်ထိုးနိုင်ခါနီး ဖြစ်နေပြီလို့ Reuters နဲ့ Axios သတင်းတွေမှာ ဖော်ပြထားပါတယ်။
ပါကစ္စတန်နဲ့ ဆော်ဒီအာရေဗျတို့ရဲ့ ကြားဝင်စေ့စပ်ပေးမှုကြောင့် အမေရိကန်သမ္မတ ထရမ့်က ရေလက်ကြားမှာ သင်္ဘောတွေကို လိုက်ပါပို့ဆောင်ပေးမယ့် Project Freedom စစ်ဆင်ရေးကို ခေတ္တရပ်နားလိုက်တာပါ။
နိုင်ငံခြားရေးဝန်ကြီး Marco Rubio ကလည်း အီရန်အပေါ် လေကြောင်းနဲ့ ရေတပ်က ထိုးစစ်ဆင်နေတဲ့ Epic Furyစစ်ဆင်ရေး ပြီးဆုံးပြီလို့ ကြေညာခဲ့ပါတယ်။
အီရန်ဘက်ကတော့ ရက်ပေါင်း ၃၀ အတွင်း စစ်ပွဲကို အဆုံးသတ်ဖို့၊ရေတပ်ပိတ်ဆို့ထားတာတွေကို ဖယ်ရှားဖို့နဲ့ အပိတ်ခံထားရတဲ့ အီရန်ပိုင်ငွေတွေကို ပြန်ပေးဖို့ တောင်းဆိုထားပါတယ်။
နျူကလီးယား ဆွေးနွေးမှုတွေကိုတော့ အခုအဆင့်မှာထည့်သွင်းမှာမဟုတ်ဘူးလို့ အီရန်နိုင်ငံခြားရေးဝန်ကြီးဌာနက အတိအလင်း ပြောထားပါတယ်။
အခုလို အမေရိကန်ဘက်က လိုက်လျောလာတာဟာ နျူကလီးယားကိစ္စနဲ့ စစ်ပွဲကိစ္စကို တပြိုင်နက်တည်း ဖြေရှင်းဖို့ မဖြစ်နိုင်တော့တာကို လက်ခံလိုက်တာလို့ စစ်ရေးလေ့လာသူတွေက သုံးသပ်ကြပါတယ်။
ဒါပေမယ့် ဟော်မုဇ်ရေလက်ကြားကို စီမံခန့်ခွဲမယ့် ပုံစံသစ်နဲ့ ပတ်သက်ပြီး နှစ်ဖက်ကြားမှာ သဘောထားကွဲလွဲမှုတွေတော့ ရှိနေဆဲပါ။
လာမယ့် မေလ ၁၄ ရက်မှာ သမ္မတထရမ့်က တရုတ်နိုင်ငံကို သွားရောက်ပြီး သမ္မတရှီကျင့်ဖျင်နဲ့ တွေ့ဆုံဖို့ ရှိနေပါတယ်။
အဲဒီခရီးစဉ်မတိုင်ခင်မှာ အီရန်နဲ့ အမေရိကန်ကြား ကနဦးသဘောတူညီချက်တခု ရနိုင်မလားဆိုတာကို နိုင်ငံတကာက စောင့်ကြည့်နေကြပါတယ်။
