Border News Agency
ဘင်္ဂလားဒေ့ရှ်၊ မေ ၇။
ဘင်္ဂလားဒေ့ရှ်နိုင်ငံ၊ စိန့်မာတင်ကျွန်းနဲ့ တက္ကနပ်ဖ်မြို့နယ် နယ်စပ်ပင်လယ်ပြင်အတွင်းမှာ မူးယစ်ဆေးဝါးတွေနဲ့ မြန်မာနိုင်ငံဘက်ကို မှောင်ခိုပို့မယ့် ကုန်ပစ္စည်းတွေကို ကမ်းခြေစောင့်တပ်ဖွဲ့က ဖမ်းဆီးရမိခဲ့တယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီစိန့်မာတင်၊ ဆဲရာဒွီးပ်အနီးမှာ မေလ ၅ ရက်နေ့၊မနက်အစောပိုင်းကသံသယဖြစ်ဖွယ် စက်လှေတစီးကို စစ်ဆေးရာကနေ တန်ဖိုးရှိ နိုင်ငံခြားဖြစ် အရက်ပုလင်းတွေနဲ့အတူ မူးယစ်ဆေးဝါး ရောင်းဝယ်သူ ၁၀ ဦးကို ဖမ်းဆီးခဲ့တယ်လို့ ဆိုပါတယ်။
ဒါ့အပြင် မေလ ၆ ရက်မနက်အစောပိုင်းမှာလည်းတက္ကနပ်ဖ်မြို့နယ်၊ရှာပူရီကျွန်းအနီး ပင်လယ်ပြင်မှာ မြန်မာနိုင်ငံဘက်ကိုတရားမဝင် မှောင်ခိုပို့ဆောင်မယ့် ပဲဆီလီတာ ၄၀၀၊ ကြက်သွန်နီ ကီလို ၄၀၀ နဲ့ ဂျုံမှုန့် ကီလို ၄၅၀ တို့ကို စက်လှေတစီး၊လူ ၃ ဦးနဲ့အတူ ထပ်မံဖမ်းဆီးရမိခဲ့တယ်လို့ဆိုပါတယ်။
အဲဒီကုန်ပစ္စည်းတွေဟာ အခွန်ရှောင်ပြီး နယ်စပ်ဖြတ်ကျော် မှောင်ခိုပို့ဆောင်ဖို့ ကြိုးပမ်းတာဖြစ်တယ်လို့ ကမ်းခြေစောင့်တပ်ဖွဲ့က ဆိုပါတယ်။
အဲဒီဖမ်းဆီးရမိတဲ့ ပစ္စည်းတွေရဲ့ တန်ဖိုးဟာ ဘင်္ဂလားဒေ့ရှ်တာကာ ၄ သိန်းကျော် (မြန်မာကျပ်ငွေ သိန်း ၁၅၀ ခန့်) ရှိတယ်လို့ သိရပါတယ်။
အဲဒီဖမ်းဆီးရမိသူတွေနဲ့ သက်သေခံပစ္စည်းတွေကို ဥပဒေအရ အရေးယူနိုင်ဖို့အတွက် သက်ဆိုင်ရာ ရဲစခန်းတွေဆီ လွှဲပြောင်းပေးဖို့ စီစဉ်နေတယ်လို့ သိရပါတယ်။
