Border News Agency
ဖိလစ်ပိုင်၊မေ ၉။
ဖိလစ်ပိုင်နိုင်ငံ စီဘူးမှာ မေလ ၈ ရက်နေ့က ကျင်းပတဲ့ အာဆီယံထိပ်သီးညီလာခံမှာ မြန်မာ့အကျပ်အတည်းကို ဖြေရှင်းရာမှာ ဘာမှတိုးတက်မလာတဲ့အပေါ် အာဆီယံခေါင်းဆောင်တွေကြား စိတ်ပျက်မှုတွေ မြင့်တက်နေတယ်လို့ အလှည့်ကျဥက္ကဋ္ဌ ဖိလစ်ပိုင်သမ္မတ မားကို့စ်ဂျူနီယာက ပြောလိုက်ပါတယ်။
အဲဒီနေ့အစည်းအဝေးမှာ အာဏာသိမ်းစစ်ခေါင်းဆောင် မင်းအောင်လှိုင်ကလွဲလို့ ကျန်တဲ့အဖွဲ့ဝင်နိုင်ငံတွေက ခေါင်းဆောင်တွေ အားလုံးတက်ရောက်ခဲ့ကြပြီး မြန်မာ့အရေးနဲ့ပတ်သက်လို့ တံခါးပိတ်ဆွေးနွေးခဲ့ကြတာပါ။
အဲဒီရပ်တန့်နေတဲ့ ငြိမ်းချမ်းရေးလုပ်ငန်းစဉ်တွေ ရှေ့ဆက်နိုင်ဖို့အတွက် အခုထက်ပိုပြီး အားထုတ်ကြိုးပမ်းသွားဖို့လည်း ခေါင်းဆောင်တွေအကြား သဘောတူညီခဲ့ကြပါတယ်။
သမ္မတမားကို့စ်ကတော့ မြန်မာ့အရေးကို ချဉ်းကပ်ဆောင်ရွက်မှုတွေဟာ “မြူတစ်မှုန်စာအရွေ့တောင် မရှိဘူး”လို့ ပြတ်ပြတ်သားသား ဝေဖန်ခဲ့ပါတယ်။
အာဏာသိမ်းစစ်တပ်ဘက်က အာဆီယံဘုံသဘောတူညီချက် ၅ ရပ်ကို အကောင်အထည်မဖော်ဘဲ အကြမ်းဖက်မှုတွေ ဆက်ဖြစ်နေတာကို ခေါင်းဆောင်တွေက စိတ်ပျက်နေကြတာပါ။
အာဆီယံအနေနဲ့ စစ်ခေါင်းဆောင်ကို ထိပ်သီးအစည်းအဝေးတွေကနေ ဆက်ပြီး ဖယ်ကြဉ်ထားပေမယ့် မကြာခင်မှာတော့ စစ်တပ်ခန့် နိုင်ငံခြားရေးဝန်ကြီးနဲ့ အာဆီယံနိုင်ငံခြားရေးဝန်ကြီးတွေ အွန်လိုင်းကနေ တွေ့ဆုံဖို့ ရှိနေတယ်လို့ သိရပါတယ်။
ဒါဟာ တိုးတက်မှုရှိမရှိ ထိတွေ့ဆက်ဆံဖို့ ကြိုးစားတဲ့ အဆင့်တခုဖြစ်ပြီး ဘယ်လိုပဲဖြစ်ဖြစ် အာဆီယံအနေနဲ့ လူ့အခွင့်အရေးနဲ့ တရားဥပဒေစိုးမိုးရေးလို အဓိကမူလမ်းစဉ်တွေကို ဖြေလျှော့ပေးမှာမဟုတ်ဘူးလို့ သမ္မတမားကို့စ်က အလေးပေးပြောကြားထားပါတယ်။
အဲဒီအာဆီယံနိုင်ငံတွေကြားမှာလည်း မြန်မာ့အရေးကို ဘယ်လိုကိုင်တွယ်မလဲဆိုတာနဲ့ ပတ်သက်ပြီး သဘောထားကွဲလွဲမှုတွေ ရှိနေဆဲပဲဖြစ်ပါတယ်။
