Border News Agency
နယူးယောက်၊ မေ ၉။
နယူးယောက်မြို့မှာ ကျင်းပတဲ့ ဒုတိယအကြိမ် အပြည်ပြည်ဆိုင်ရာ ရွှေ့ပြောင်းနေထိုင်ခြင်းဆိုင်ရာ ပြန်လည်သုံးသပ်မှုဖိုရမ်မှာ ဦးကျော်မိုးထွန်းက မြန်မာပြည်သူတွေ ဘေးကင်းစွာ နေရပ်ပြန်နိုင်ဖို့ စစ်အာဏာရှင်စနစ် ချုပ်ငြိမ်းဖို့ လိုအပ်တယ်လို့ မိန့်ခွန်းပြောကြားခဲ့ပါတယ်။
မြန်မာနိုင်ငံမှာရွှေ့ပြောင်းနေထိုင်ရတဲ့ အခြေအနေဟာ အရင်လို တိုင်းပြည်ဖွံ့ဖြိုးဖို့ ရွေးချယ်တာမျိုးမဟုတ်ဘဲ စစ်အာဏာသိမ်းပြီးနောက်ပိုင်း အသက်ရှင်သန်နိုင်ဖို့အတွက်သာ မဖြစ်မနေ ထွက်ပြေးနေရတဲ့ အခြေအနေဆိုးကို ရောက်နေတာလို့ ဆိုပါတယ်။
အာဏာသိမ်းစစ်တပ်က ကျူးလွန်နေတဲ့ ကြမ်းကြုတ်မှုတွေနဲ့ အဓမ္မစစ်သားစုဆောင်းတာတွေဟာ ပြည်သူတွေ နေရပ်စွန့်ခွာရတဲ့ အဓိကအရင်းအမြစ်ဖြစ်တယ်လို့လည်း ထောက်ပြခဲ့ပါတယ်။
ဒါ့အပြင်သူ့ရဲ့ မိသားစုဝင်တွေပါ နိုင်ငံကနေ ထွက်ပြေးခဲ့ရတဲ့ အတွေ့အကြုံကို ဥပမာပေးပြီး လူငယ်တွေရော လူကြီးတွေပါ ဘေးကင်းရာကို ရှောင်တိမ်းနေရတဲ့အခြေအနေဖြစ်နေတယ်လို့ဆိုပါတယ်။
မြန်မာနိုင်ငံဟာ အခုဆိုရင် လူကုန်ကူးမှုနဲ့ အွန်လိုင်းလိမ်လည်မှုတွေလို နယ်စပ်ဖြတ်ကျော်မှုခင်းတွေ ကျူးလွန်တဲ့နေရာ ဖြစ်လာနေတာကြောင့် ဒါကို နိုင်ငံတကာကဖြေရှင်းပေးဖို့လည်း တိုက်တွန်းခဲ့ပါတယ်။
အဲဒီအပြင်ပြည်ပရောက်နေတဲ့ မြန်မာပြည်သူတွေဟာ သူတို့ရဲ့ နေရပ်ကို အမြန်ဆုံး ပြန်ချင်ကြပေမယ့် စစ်အာဏာရှင်စနစ် အပြီးတိုင်ချုပ်ငြိမ်းပြီး ဖက်ဒရယ်ဒီမိုကရေစီ ပြည်ထောင်စု ပေါ်ထွန်းလာမှသာ ဂုဏ်သိက္ခာရှိရှိနဲ့ ဘေးကင်းကင်း ပြန်လာနိုင်မှာဖြစ်တယ်လို့ ဆိုပါတယ်။
အဲဒါကြောင့် မြန်မာပြည်သူတွေရဲ့ ကြိုးပမ်းမှုတွေကို နိုင်ငံတကာ အသိုက်အဝန်းအနေနဲ့ ဝိုင်းဝန်းကူညီပေးကြဖို့တောင်းဆိုထားပါတယ်။
အမျိုးသားညီညွတ်ရေးအစိုးရနဲ့တိုင်းရင်းသား အင်အားစုတွေဟာ မြန်မာပြည်သူလူထုအတွက် ကောင်းမွန်တဲ့ အနာဂတ်ကို ဖော်ဆောင်ပေးဖို့ အားသွန်ခွန်စိုက် ကြိုးပမ်းနေကြတယ်လို့လည်းဆိုပါတယ်။
ဒါကြောင့် မြန်မာနိုင်ငံမှာ ရေရှည်တည်တံ့တဲ့ ငြိမ်းချမ်းရေးနဲ့ တည်ငြိမ်ရေး ရရှိလာဖို့အတွက် နိုင်ငံတကာအနေနဲ့ ပြည်သူတွေရဲ့ ကြိုးပမ်းမှုတွေကို လက်တွေ့ကျကျ ဝိုင်းဝန်းပံ့ပိုးပေးဖို့ လိုအပ်နေတာလို့လည်းဆိုပါတယ်။
