Border News Agency
မကွေး၊မေ ၁၆။
မကွေးတိုင်း၊ ဆောမြို့နယ်အတွင်း ယာယီပိတ်ထားတဲ့ စတားလင့်အင်တာနက်ဝန်ဆောင်မှုတွေကို အကန့်အသတ်နဲ့ ပြန်လည်ခွင့်ပြုရာမှာ ခရီးသွားဧည့်သည်တွေကို အသုံးပြုခွင့် လုံးဝပိတ်ပင်လိုက်တယ်လို့ သိရပါတယ်။
အဲဒီစတားလင့်ဘောက်ချာကတ်တွေကို မိမိတို့ ရပ်ကွက်နဲ့ကျေးရွာအတွင်း အမှန်တကယ် နေထိုင်သူတွေကိုသာ ရောင်းချရမှာဖြစ်ပြီး ခရီးသွားတွေကို ရောင်းချခြင်း လုံးဝမပြုဖို့ အဲဒီဆောမြို့နယ် ပြည်သူ့အုပ်ချုပ်ရေးအဖွဲ့က သတိပေးထားပါတယ်။
စစ်ဘေးရှောင်တွေအတွက် ဝယ်ယူဖို့ လိုအပ်ရင် စစ်ရှောင်တွေတည်းခိုရာ အိမ်ရှင် (သို့မဟုတ်) ရပ်ရွာတာဝန်ရှိသူတွေကတဆင့်သာ ဝယ်ယူခွင့်ပြုမှာဖြစ်ပြီး အသုံးပြုသူစာရင်းကိုလည်း ဇယားနဲ့တကွ စနစ်တကျ မှတ်တမ်းတင်ထားရမှာ ဖြစ်ပါတယ်။
အင်တာနက် အသုံးပြုသူတွေအနေနဲ့ စစ်ရေးသတင်းတွေ၊ နယ်မြေအတွင်း ရှုပ်ထွေးစေမယ့် သတင်းမှားတွေနဲ့ တော်လှန်ရေးအဖွဲ့တွေကြား သွေးကွဲစေမယ့် အရေးအသားတွေကို အွန်လိုင်းပေါ်မှာ ရေးသားတာမပြုဖို့လည်း ကန့်သတ်ထားပါတယ်။
အဲဒီစည်းကမ်းချက်တွေကို လိုက်နာတာမရှိရင်စက်ပစ္စည်းတွေကို သိမ်းဆည်းတာအပြင် တခြားသော ထိရောက်တဲ့ အရေးယူမှုတွေကိုပါ ဆောင်ရွက်သွားမယ်လို့ ဆောမြို့နယ် ပအဖ က အသိပေးထားပါတယ်။
