Border News Agency
မကွေး၊မေ ၁၈။
မကွေးတိုင်း၊စလင်းမြို့နယ်အတွင်းမှာ စစ်ကြောင်းဖြတ်သန်းသွားလာနိုင်ဖို့အတွက် ကြိုတင်ပြီး ကင်းပုန်းလာဝပ်တဲ့ အာဏာသိမ်းစစ်တပ်တပ်ဖွဲ့ဝင်တွေကို ပြည်သူ့ကာကွယ်ရေးတပ်ဖွဲ့တွေက မိုင်းဆွဲတိုက်ခိုက်ခဲ့တာကြောင့် ထိခိုက်သေဆုံးသူတွေ များပြားခဲ့တယ်လို့ မင်းဘူးခရိုင် အမှတ် ၅ တပ်ရင်းကမေလ ၁၇ ရက်၊မနေ့ကထုတ်ပြန်ပါတယ်။
အဲဒီတိုက်ခိုက်မှုဟာ အာဏာသိမ်းစစ်တပ်က စစ်ရေးလှုပ်ရှားမှုတွေ လုပ်ဆောင်နေတဲ့ စလင်း-ကံပြား လမ်းပိုင်းတနေရာမှာ ဖြစ်ပွားခဲ့တာပါ။
စစ်ကြောင်းလမ်းကြောင်း ရှင်းလင်းရေးနဲ့ ကင်းပုန်းဝပ်ဖို့အတွက် ကံပြားဘက်ကနေ အင်အား ၃၀ ဝန်းကျင် တင်ဆောင်လာတဲ့ ကားအဖြူတစီးဟာ ကာကွယ်ရေးရဲဘော်တွေ ကြိုတင်ထောင်ထားတဲ့ မိုင်းကွင်းအနီးကို ရောက်ရှိလာချိန်မှာမိုင်းဆွဲတိုက်ခိုက်ခဲ့တာလို့ဆိုပါတယ်။
အဲဒီ ကားအဖြူပေါ်ကနေ အာဏာသိမ်းစစ်အုပ်စုရဲ့လက်အောက်ခံ စစ်သားတွေ၊ ရဲတွေနဲ့ ပျူစောထီးတွေကို လမ်းပေါ်ကို ချနေတဲ့အချိန်မှာတင် မိုင်းပေါက်ကွဲသွားခဲ့တာလို့ဆိုပါတယ်။
မိုင်းကွင်းအလယ်တည့်တည့်မှာ မိသွားတာဖြစ်လို့ အာဏာသိမ်းစစ်တပ်ဘက်ကအကျအဆုံးတွေ များပြားခဲ့တယ်လို့ တော်လှန်ရေးရဲဘော်တွေက ဆိုပါတယ်။
အဲဒီစလင်း-ကံပြား လမ်းပိုင်းတလျှောက် သွားလာလှုပ်ရှားနေကြတဲ့ မိဘပြည်သူတွေအနေနဲ့ အာဏာသိမ်းစစ်တပ်ရဲ့ စစ်ကြောင်းတွေ၊ ယာဉ်တန်းတွေနဲ့ အတူပူးတွဲပြီး သွားလာတာမျိုး လုံးဝမလုပ်ကြဖို့ သတိပေးထားပါတယ်။
ဒါ့အပြင် အများပြည်သူစီးနင်းတဲ့ ခရီးသည်တင်ကားတွေပေါ်မှာ အာဏာသိမ်းစစ်သားတွေ၊သူတို့ရဲ့ လက်နက်ခဲယမ်းတွေနဲ့ ရိက္ခာတွေကို တင်ဆောင်ပေးတာမျိုးတွေ မလုပ်ကြဖို့ကိုလည်းတားမြစ်ထားပါတယ်။
