Border News Agency
မီဇိုရမ်၊မေ ၂၂။
မီဇိုရမ်ပြည်နယ်၊ချမ်ဖိုင်ခရိုင်၊ ဇိုတေးရှောင်ကွင်းလမ်းမှာ မေလ ၂၁ ရက်၊မနေ့က မြန်မာနိုင်ငံမှ တရားမဝင် ဝင်ရောက်လာတဲ့ ကျပ်သိန်း ၅ ထောင်ကျော်တန် ဟီးရိုးအင်းမူးယစ်ဆေးဝါး ၆၂၀ ဂရမ်ကျော်ကို ဖမ်းဆီးရမိခဲ့ပါတယ်။
အဲဒီဖမ်းဆီးမှုကို မိုင်ဇိုရမ် အကောက်ခွန်နဲ့ မူးယစ်ဆေးဝါးနှိမ်နင်းရေးဌာနနဲ့အမှတ် ၁၄ အာသံရိုင်ဖယ်တပ်ဖွဲ့တို့ ပူးပေါင်းလုပ်ဆောင်ခဲ့တာဖြစ်ပြီး ဆပ်ပြာခွက် ၅၀ ထဲ ထည့်သွင်းသယ်ဆောင်လာတာ ဖြစ်ပါတယ်။
မူးယစ်ဆေးဝါးတွေနဲ့အတူ အာသံပြည်နယ်၊ ကာချာခရိုင်သား အသက် ၂၈ နှစ်အရွယ် ဂျေဒါနာမူးလ် ဘာဘူအီယာ ဆိုသူကို ဖမ်းဆီးရမိခဲ့ပြီး၊သူသယ်ဆောင်လာတဲ့ TATA ကုန်တင်ကားကိုလည်း သိမ်းဆည်းခဲ့ပါတယ်။
အဲဒီဟီးရိုးအင်းတွေကို မြန်မာနိုင်ငံဘက်ကနေ သယ်ဆောင်လာတာဖြစ်ပြီး အာသံပြည်နယ်အတွင်း သွားရောက်ဖြန့်ဖြူးဖို့ စီစဉ်ထားတာလို့သိရပါတယ်။
အဲဒီတရားခံကို ချမ်ဖိုင်ခရိုင်တရားရုံးမှာ မူးယစ်ဥပဒေ (NDPS Act)နဲ့အမှုဖွင့်ထားပြီးပြစ်မှုထင်ရှားရင် ထောင်ဒဏ် ၁၀ နှစ်မှ ၂၀ နှစ်အထိ ကျခံရနိုင်ကာ ငွေဒဏ်လည်း ချမှတ်ခံရနိုင်ပါတယ်။
