Border News Agency
မန္တလေး၊ဇွန် ၂၀။
မန္တလေးတိုင်း၊ရမည်းသင်းမြို့နယ်မှ ရခိုင်သို့ ပို့ဆောင်မယ့်ကျပ်ဆယ်ဘီလျံခန့်တန်ဖိုးရှိ စိတ်ကြွဆေးပြားသိန်းငါးဆယ်ကို မကွေးတိုင်း၊အောင်လံမြို့မှာ ဖမ်းမိခဲ့တယ်လို့ အာဏာသိမ်းစစ်တပ်ရဲ့ မူးယစ်ဆေးဝါးထိန်းချုပ်ရေးဗဟိုကော်မတီ (CCDAC) က ဇွန်လ ၂၀ ရက်၊ဒီနေ့ထုတ်ပြန်ပါတယ်။
အဲဒီအောင်လံမြို့၊ မန်ကျည်းကုန်းရပ် ကွက်ရှိ အောင်လံ Resort ဟိုတယ်မှာမူးယစ်ဆေးဝါးတွေရောက်ရှိနေတဲ့ သတင်းအရ ဇွန်လ ၁၇ ရက်နေ့က ဝင်ရောက်စစ်ဆေးဖမ်းမိခဲ့တာလို့ဆိုပါတယ်။
အဲဒီဟိုတယ်မှာ တည်းခိုနေတဲ့ ခွန်အောင်ဝင်းနဲ့ ဇနီးဖြစ်သူ မနန်းဒေစီအောင် တို့ရဲ့ ခရီးဆောင်အိတ်တွေထဲက စိတ်ကြွဆေးပြား သိန်းနှစ်ဆယ်ကို ဦးစွာ ရှာဖွေတွေ့ရှိခဲ့တယ်လို့ ဆိုပါတယ်။
အဲဒီအပြင် ဟိုတယ်ဝင်းထဲမှာ ရပ်နားထားတဲ့ လိုင်စင်မဲ့ Honda Stepwagon အမျိုးအစား ကားပေါ်က ဝါသေဋ္ဌ (ခ) ဝင်းနိုင် ဆိုသူနဲ့အတူ ကားနောက်ခန်းအတွင်း ဆာလာအိတ်တွေနဲ့ ထည့်ထားတဲ့ စိတ်ကြွဆေးပြား သိန်းသုံးဆယ်ကို ထပ်ဖမ်းမိခဲ့တယ်လို့ဆိုပါတယ်။
အဲဒီဖမ်းမိသူတွေထွက်ဆိုချက်အရ မူးယစ်ဆေးဝါး သယ်ဆောင်ရာမှာ ပါဝင်တဲ့ အောင်လေး (ခ) အောင်နိုင်မင်း ဆိုသူကိုလည်း အောင်လံမြို့နယ်၊ မိုးဖုန်းကျေးရွာမှာ ဖမ်းမိခဲ့ပြီး သူတို့လေးဦးကို မူးယစ်ဥပဒေနဲ့အရေးယူဖို့ လုပ်နေတယ်လို့ဆိုပါတယ်။
