Border News Agency
နေပြည်တော်၊ ဇွန် ၂၄။
အိန္ဒိယရူပီးနဲ့ မြန်မာကျပ်ငွေတိုက်ရိုက်လဲလှယ်ရေးကို နှစ်နိုင်ငံဗဟိုဘဏ်တွေကြားတည်ထောင်ဖို့အတွက် သဘောတူညီချက်မူကြမ်းရေးဆွဲနေတဲ့ အခြေအနေတွေကို မြန်မာနဲ့အိန္ဒိယတို့ ဆွေးနွေးခဲ့ကြတယ်လို့ အာဏာသိမ်းစစ်တပ်က ထုတ်ပြန်ပါတယ်။
အဲဒီဆွေးနွေးမှုကို အာဏာသိမ်းစစ်တပ်ရဲ့ ဗဟိုဘဏ်ဥက္ကဋ္ဌဒေါက်တာခင်နိုင်ဦးနဲ့ မြန်မာနိုင်ငံဆိုင်ရာအိန္ဒိယသံအမတ်ကြီး H.E. Mr. Abhay Thakur တို့က ဇွန်လ ၂၃ ရက်နေ့မှာ နေပြည်တော်မှာရှိတဲ့ ဗဟိုဘဏ်အစည်းအဝေးခန်းမမှာ တွေ့ဆုံခဲ့ကြတာပါ။
တွေ့ဆုံပွဲမှာ နှစ်နိုင်ငံကုန်သွယ်မှုနဲ့ ရင်းနှီးမြှုပ်နှံမှုတွေအတွက် လက်ရှိအသုံးပြုနေတဲ့ ရူပီး/ကျပ် တိုက်ရိုက်ငွေပေးချေမှုနည်းလမ်းကို အရင်ကထက်ပိုမိုအကျိုးရှိပြီး ထိရောက်မှုရှိစေဖို့ ဘယ်လိုဆက်လုပ်မလဲဆိုတဲ့ ကိစ္စရပ်တွေကို အဓိကထားဆွေးနွေးခဲ့ကြပါတယ်။
အဲဒီအပြင် အိန္ဒိယဗဟိုဘဏ် (RBI)၊ အိန္ဒိယအမျိုးသားငွေပေးချေမှုကော်ပိုရေးရှင်း (NPCI) တို့နဲ့ မြန်မာနိုင်ငံတော်ဗဟိုဘဏ် MMQR Consortium၊ Myanmar Payment Union (MPU)တို့ကြားက နည်းပညာပိုင်းဆိုင်ရာ ပူးပေါင်းဆောင်ရွက်မှုတွေကိုလည်းဆွေးနွေးခဲ့ကြတယ်လို့ဆိုပါတယ်။
အိန္ဒိယနိုင်ငံရဲ့ UPI QR စနစ်၊ RuPay စနစ်တွေနဲ့ မြန်မာနိုင်ငံရဲ့ MMQR စနစ်တို့ကို အပြန်အလှန်ချိတ်ဆက်အသုံးပြုနိုင်ရေးအတွက် လက်ရှိမြေပြင်မှာ ဖော်ဆောင်နေတဲ့ လုပ်ငန်းစဉ်အခြေအနေတွေကို နှစ်ဖက်အမြင်ချင်းဖလှယ်ခဲ့ကြတယ်လို့လည်းဆိုပါတယ်။
