Border News Agency
ဆွာမကြီး၊ဇူလိုင် ၂။
ပဲခူးနဲ့မကွေးဒေသမှာ တော်လှန်ရေးတပ်တွေရဲ့ တလတာစစ်ဆင်ရေးတွေအတွင်း အရာရှိလေးဦးအပါအဝင် အာဏာသိမ်းစစ်သားလေးဆယ်ကျော်သေဆုံးသွားတယ်လို့ နေပြည်တော်တိုင်းစစ်ဌာနက ဇူလိုင်လ ၂ ရက်၊ မနေ့က ထုတ်ပြန်ပါတယ်။
ပြီးခဲ့တဲ့ဇွန်လအတွင်းစစ်ဆင်ရေးတွေကြောင့် စစ်တပ်ဘက်မှ အရာရှိလေးဦး အပါအဝင်လေးဆယ်ကျော်သေဆုံးပြီး ရဲစခန်းမှူးအဆင့် တဦး အပါအဝင် အများအပြား ဒဏ်ရာရသွားခဲ့တယ်လို့ဆိုပါတယ်။
အဲဒီစစ်ဆင်ရေးတလတာအတွင်း စစ်တပ်ဘက်မှ လက်နက်ငယ်ဆယ့်ရှစ်လက်နဲ့ ခဲယမ်းဆက်စပ်ပစ္စည်းအများအပြားကို သိမ်းဆည်းရမိခဲ့တယ်လို့ ဆိုပါတယ်။
ဆွာမြို့နယ်အတွင်းတပ်စွဲထားတဲ့ ဆွာမကြီးစစ်တပ်စခန်းကို ဇွန်လ ၃ ရက်နေ့က PDF တပ်ရင်းတွေနဲ့ နေပြည်တော် ပကဖ တို့ပူးပေါင်းတိုက်ခိုက်သိမ်းပိုက်နိုင်ခဲ့ပြီး နတ်မောက်မြို့နယ် ကွင်းကြီးကျေးရွာအနီး စစ်တပ်ရဲ့ စိုင်ကောင်းရဲစခန်းမှူးလိုက်ပါလာတဲ့ ယာဉ်တန်းကို ဇွန်လ ၄ ရက်နေ့ကတိုက်ခိုက်ခဲ့တယ်လို့ဆိုပါတယ်။
အဲဒီအပြင် ရေတာရှည်မြို့နယ်၊ပိတောက်ကုန်းနဲ့ ကျွန်းကုန်းကျေးရွာတွေမှာတပ်စွဲထားတဲ့စစ်တပ်စခန်းကို ဇွန်လ ၂၄ ရက်နေ့က PDF ဗျူဟာ ၁၈၊၁၉ မှ တပ်ရင်းတွေပူးပေါင်းပြီးတိုက်ခိုက်ခဲ့တာကြောင့် စစ်တပ်ဘက်မှသေဆုံးထိခိုက်တာတွေ များခဲ့တယ်လို့ဆိုပါတယ်။
အဲဒီတိုက်ပွဲတွေဟာ စစ်ဆင်ရေးနယ်မြေတွေဖြစ်တဲ့ ပဲခူးဒေသ၊ ဆွာ၊ရေတာရှည်မြို့နယ်အတွင်းရှိ စစ်တောင်းမြစ်အရှေ့ဘက်ကမ်းစစ်ခွင်နဲ့ မကွေးဒေသ အောင်လံ၊ တောင်တွင်းကြီး၊ နတ်မောက်မြို့နယ်တွေအတွင်းရှိ အလယ်ရိုးမစစ်ခွင်တွေမှာ တလအတွင်း ဆင်နွှဲခဲ့တဲ့ စစ်ဆင်ရေးတွေဖြစ်တယ်လို့ နေပြည်တော်တိုင်းစစ်ဌာနမှအသိပေးထားပါတယ်။
