Border News Agency
နေပြည်တော်၊ သြဂုတ် ၉။
နေပြည်တော်မှာ ဒေါ်အောင်ဆန်းစုကြည်နဲ့အပြည်ပြည်ဆိုင်ရာကြက်ခြေနီကော်မတီ(ICRC)မှ ဌာနေကိုယ်စားလှယ်မစ္စတာ Arnaud de Baecque ဟာ သြဂုတ်လ ၃ ရက်နေ့ကတွေ့ခဲ့ပါတယ်။
အဲဒီလိုတွေ့တာဟာ မြန်မာနိုင်ငံရဲ့တည်ဆဲဥပဒေ၊ သက်ဆိုင်ရာလုပ်ထုံးလုပ်နည်းတွေနဲ့ အပြည်ပြည်ဆိုင်ရာကြက်ခြေနီကော်မတီရဲ့စံနှုန်း၊လုပ်ငန်းစဉ်တွေနဲ့အညီလုပ်ခဲ့တာလို့ အာဏာသိမ်းစစ်တပ်က ဆိုပါတယ်။
အဲဒီတွေ့ဆုံမှုကို အာဆီယံဥက္ကဋ္ဌက သြဂုတ်လ ၇ ရက်နေ့ကထုတ်ပြန်တာမှာ အပြုသဘောဆောင်တဲ့ဖော်ပြချက်တွေကို မြန်မာနိုင်ငံကအသိအမှတ်ပြုပေမယ့် တချို့စာသားတွေနဲ့တောင်းဆိုချက်တွေဟာ အဖွဲ့ဝင်နိုင်ငံတနိုင်ငံရဲ့ အပြုသဘောဆောင်တဲ့ဆောင်ရွက်မှုအပေါ် ထင်ဟပ်မှုမရှိတာမို့ စိတ်ပျက်မိတယ်လို့ အာဏာသိမ်းစစ်တပ်ဆိုပါတယ်။
“မြန်မာနိုင်ငံရှိ ထိန်းသိမ်းခံထားရသူများအား တွေ့ဆုံခွင့်ပိုမိုပေးအပ်ရန်” နဲ့“ဒေါ်အောင်ဆန်းစုကြည်အား ခြွင်းချက်မရှိအပြည့်အဝလွှတ်ပေးရန်” တောင်းဆိုချက်တွေဟာ နိုင်ငံတနိုင်ငံရဲ့သက်ဆိုင်ရာတရားစီရင်ရေးလုပ်ငန်းစဉ်နဲ့ ဥပဒေစိုးမိုးရေးဆိုင်ရာအခြေခံမူတွေ အပေါ် သက်ရောက်မှုရှိစေတယ်လို့ အာဏာသိမ်းစစ်တပ်တုံ့ပြန်ပါတယ်။
ဒေါ်အောင်ဆန်းစုကြည်ဟာ ရွေးကောက်ပွဲမဲမသမာမှု၊ အဂတိလိုက်စားမှုနဲ့ မှားယွင်းတဲ့စီမံခန့်ခွဲမှုတွေကျူးလွန်ကြောင်း တရားဥပဒေအရပြစ်မှုထင်ရှားတဲ့အတွက် ပြစ်မှုဆိုင်ရာဥပဒေအရစိစစ်အရေးယူထားတာလို့ အာဏာသိမ်းစစ်တပ်က ဆိုပါတယ်။
လူသားချင်းစာနာထောက်ထားမှုဆိုင်ရာရှုထောင့်အရ ဒေါ်အောင်ဆန်းစုကြည်ကို ပြစ်ဒဏ်တွေလျှော့ပေါ့ပေးနေပေမယ့် ဒေါ်အောင်ဆန်းစုကြည်ကိုခြွင်းချက်မရှိ အပြည့်အဝလွှတ်ပေးရေးကိစ္စမှာ တရားဥပဒေနဲ့အညီသာဖြစ်နိုင်တယ်လို့ အာဏာသိမ်းစစ်တပ်က ဆိုပါတယ်။
မြန်မာနိုင်ငံရဲ့နိုင်ငံခြားရေးမူဝါဒနဲ့အညီ ပကတိအခြေအနေတွေအပေါ်အခြေခံပြီး အမျိုးသားအကျိုးစီးပွားနဲ့အချုပ်အခြာအာဏာကို အလေးထားစောင့်ရှောက်ကာ မြန်မာနိုင်ငံကဦးဆောင်တဲ့ မြန်မာ့ကိုယ်ပိုင်နည်းလမ်းနဲ့ အာဆီယံနဲ့ဆက်ဆံရေးတိုးတက်အောင်လုပ်သွားမယ်လို့ အာဏာသိမ်းစစ်တပ်ထုတ်ပြန်ပါတယ်။
