Border News Agency
စစ်ကိုင်း၊ဩဂုတ် ၁၇။
စစ်ကိုင်းတိုင်းဒေသကြီးအတွင်း အဆက်မပြတ်မိုးရွာသွန်းမှုနဲ့ သဖန်းဆိပ်ဆည်ရေတို့ကြောင့် မြို့နယ်ဆယ့်သုံးမြို့နယ်ထက်မနည်းမှာ ပြင်းထန်တဲ့ရေကြီးရေလျှံမှုတွေဖြစ်ပွားခဲ့တယ်လို့ Women for Justice (WJ) က သြဂုတ်လ ၁၇ ရက်၊ဒီနေ့ထုတ်ပြန်ပါတယ်။
အဲဒီရေဘေးကြောင့် ပြည်သူနှစ်သိန်းနှစ်သောင်းခုနှစ်ထောင်ကျော်ရေဘေးသင့်နေပြီး ရေကြီးမှုနဲ့လေကြောင်းတိုက်ခိုက်မှုတွေကြောင့် နှစ်ဆယ့်ငါးဦးထိသေဆုံး၊ ပျောက်ဆုံးနေပြီး အဲဒီထဲမှာအမျိုးသမီးနဲ့ မိန်းကလေးငယ်တွေလည်းပါဝင်နေပါတယ်။
ရေဘေးသင့်ဒေသတွေမှာ လမ်းပန်းဆက်သွယ်ရေးပြတ်တောက်နေတာကြောင့် ကိုယ်ဝန်ဆောင်တွေမွေးဖွားဖို့နဲ့ အရေးပေါ် ဆေးဝါးကုသခွင့်ဖို့ခက်ခဲနေပြီး အမျိုးသမီးလစဉ်သုံးပစ္စည်းတွေနဲ့သန့်ရှင်းတဲ့ သောက်သုံးရေတွေအရေးပေါ် လိုအပ်နေပါတယ်။
အဲဒီအပြင် ယာယီစခန်းတွေမှာလူဦးရေပြည့်ကြပ်နေပြီး သီးသန့်ရေချိုးခန်းနဲ့အိမ်သာတွေမရှိတာကြောင့် အမျိုးသမီးတွေနဲ့မိန်းကလေးငယ်တွေအတွက် လုံခြုံရေးအရစိုးရိမ်ရတဲ့ အခြေအနေတွေကြုံတွေ့နေရပါတယ်။
နောက်ပြီး လက်ရှိမှာစိုက်ပျိုးမြေဧကတသောင်းကျော်ပျက်စီးခဲ့ရပြီး ရေဘေးနဲ့စစ်ဘေးဒဏ်နှစ်ထပ်ကွမ်းရင်ဆိုင်နေရတာကြောင့် အစားအသောက်ရှားပါးမှုတွေအပြင် မြွေဆိုးအန္တရာယ်နဲ့ ကူးစက်ရောဂါတွေပါ စိုးရိမ်နေရတယ်လို့ဆိုပါတယ်။
