Border News Agency
မဏိပူရ်၊ ဩဂုတ် ၂၁။
အိန္ဒိယနိုင်ငံ၊မဏိပူရ်ပြည်နယ်၊ဂျီရီဘမ်းဒေသမှာ ကာလတန်ဖိုး ရူပီး ၂၇ကုဋေကျော် (မြန်မာငွေ ဘီလီယံချီ)တန်ဖိုးရှိ မူးယစ်ဆေးဝါးတွေကိုဖမ်းဆီးရမိခဲ့တယ်လို့ အာသံရိုင်ဖယ်တပ်က သြဂုတ်လ ၂၁ ရက်၊ဒီနေ့ထုတ်ပြန်ပါတယ်။
အဲဒီဂျီရီဘမ်းဒေသမှာ အာသံရိုင်ဖယ်တပ်ဖွဲ့နဲ့ ပြည်နယ်ရဲတပ်ဖွဲ့တို့ပူးပေါင်းပြီး ဩဂုတ်လ ၂၀ ရက်နေ့က စက်လှေတစီးကို ဝင်ရောက်စစ်ဆေးခဲ့တယ်လို့ဆိုပါတယ်။
ပူးပေါင်းတပ်ဖွဲ့တွေရဲ့ အမြန်လိုက်လံဖမ်းဆီးစစ်ဆေးမှုကြောင့် တရားမဝင်မူးယစ်ဆေးဝါး သယ်ဆောင်လာသူ လူခြောက်ဦးကိုလည်း ဖမ်းဆီးရမိခဲ့တာဖြစ်ပါတယ်။
အဲဒီဖမ်းဆီးမှုအတွင်း ကာလတန်ဖိုး ရူပီး ၂၇ ကုဋေခန့်တန်ဖိုးရှိ Yaba ဆေးပြား ၉၀,၀၀၀ (ကိုးသောင်း) နဲ့ ရူပီး ၂၈ သိန်းကျော်တန်ဖိုးရှိ ဟီးရိုးအင်း ၄၈ ဂရမ်တို့ကို သိမ်းဆည်းရမိခဲ့တာပါ။
အခုလိုပူးပေါင်းစစ်ဆင်ရေး အောင်မြင်စွာလုပ်ဆောင်နိုင်ခဲ့တာဟာ မူးယစ်ဆေးဝါးမှောင်ခိုကွန်ရက်တွေကို ကြီးမားတဲ့ထိုးနှက်ချက်တခုဖြစ်စေခဲ့တယ်လို့ ဆိုပါတယ်။
အဲဒီအပြင်လုံခြုံရေးတပ်ဖွဲ့တွေအနေနဲ့ နယ်မြေဘေးကင်းလုံခြုံရေးနဲ့ မူးယစ်ဆေးဝါးကင်းစင်ရေးတို့အတွက် ဆက်လက်ကြိုးပမ်းဆောင်ရွက်သွားမယ်လို့လည်း ဆိုပါတယ်။
