Border News Agency
ရသေ့တောင်၊ အောက်တိုဘာ ၁။
အာရက္ခတပ်တော်(AA)ထိန်းချုပ်ထားတဲ့ရသေ့တောင်မြို့နယ်၊ ကူတောင်ရွာကို စက်တင်ဘာလ ၃၀ ရက်နေ့ညက အာဏာသိမ်းစစ်တပ်လေကြောင်းတိုက်ခိုက်လို့ သက်ကြီးတဦးသေဆုံးပြီး တဦးဒဏ်ရာရသွားတယ်လို့ ကူတောင်ဒေသခံတွေက ဆိုကြပါတယ်။
အဲဒီရသေ့တောင်မြို့နယ်၊ကူတောင်ရွာက အသက်ငါးဆယ်တနှစ်အရွယ် ဒူးကြီး(ခေါ်)ဦးအာင်ထွန်းသိန်းသေဆုံးပြီး အသက်လေးဆယ်လေးနှစ်အရွယ်ဒေါ်ဝင်းနုဒဏ်ရာရသွားတယ်လို့ ကူတောင်ရွာသားတွေကဆိုကြပါတယ်။
“အခင်သေပြီး အရီးဒဏ်ရာရသွားပါတယ်။”လို့ ကူတောင်ရွာမှအမျိုးသမီးတဦးက Border News Agency ကို ပြောပါတယ်။
အဲဒီအပြင် ပုဏ္ဏားကျွန်းမြို့နယ်၊ကျောက်ဆိပ်ကျေးရွာအနီးရှိ ဝန်ထမ်းအိမ်ရာလေးထပ်ဆောင်ကို စက်တင်ဘာလ ၃၀ ရက်နေ့၊ည ၉ နာရီကျော်အချိန်က အာဏာသိမ်းစစ်တပ်လေကြောင်းတိုက်ခိုက်ခဲ့တယ်လို့ ပုဏ္ဏားကျွန်းဒေသခံတွေကဆိုကြပါတယ်။
အဲဒီပုဏ္ဏားကျွန်းမြို့နယ်၊ဝန်ထမ်းအိမ်ရာလေးထပ်ဆောင်လေကြောင်းတိုက်ခံရတာမှာ ဒဏ်ရာရသူတွေရှိတယ်လို့ဆိုပေမယ့် အသေးစိတ်ကို မသိရသေးပါဘူး။
အဲဒီပုဏ္ဏားကျွန်းမြို့နယ်မှာ အာရက္ခတပ်တော်နဲ့အာဏာသိမ်းစစ်တပ်ကြားတိုက်ပွဲတွေ ပြင်းထန်နေတာမို့ အာဏာသိမ်းစစ်တပ်က လေကြောင်းတိုက်ကူတွေပေးနေတယ်လို့ ပုဏ္ဏားကျွန်းဒေသခံတွေကဆိုကြပါတယ်။
အဲဒီပုဏ္ဏားကျွန်းမြို့နယ်ကို စက်တင်ဘာလ ၃၀ ရက်နေ့၊မနက်ကစတင်ပြီးအာဏာသိမ်းစစ်တပ်က လက်နက်ကြီးတွေပစ်ခတ်နေတာဖြစ်ပြီး စက်တင်ဘာလ ၃၀ ရက်နေ့ညထိ လက်နက်ကြီးအဆက်မပြတ်ပစ်ခတ်နေတယ်လို့ မြေပြင်စစ်ရေးသတင်းရင်းမြစ်တွေက ဆိုကြပါတယ်။
အဲဒီပုဏ္ဏားကျွန်းမြို့နယ်၊တန်ဘက်လှန်းရွာကို စက်တင်ဘာလ ၃၀ ရက်နေ့၊ မနက် ၆ နာရီအချိန်ခန့်က အာဏာသိမ်းစစ်တပ်လက်နက်ကြီးတွေ ပစ်ခတ်ခဲ့ပါတယ်။
အဲဒီအပြင် ရသေ့တောင်၊ပုဏ္ဏားကျွန်း၊ပေါက်တောစတဲ့ မြို့နယ်တွေကိုလည်းအာဏာသိမ်းစစ်တပ်ကလေကြောင်းတိုက်ခိုက်တာတွေ တညလုံးနီးပါးပြုလုပ်နေတယ်လို့ ဒေသခံတွေကဆိုကြပါတယ်။
