Border News Agency
ဖူးခက်၊ နိုဝင်ဘာ ၁၄။
ထိုင်းနိုင်ငံ၊ဖူးခက်မြို့ရှိ ကားဂိတ်သစ်ရှေ့ မီးပွိုင့်လမ်းဆုံမှာ နိုဝင်ဘာလ ၁၄ ရက်နေ့ မနက်ပိုင်းက ဆယ်ဘီးကားတစီး အရှိန်လွန်ဝင်တိုက်မှုကြောင့် မီးပွိုင့်စောင့်နေတဲ့ ကားဆယ်စီးနဲ့ ဆိုင်ကယ် တစီး စုစုပေါင်း ယာဉ်ဆယ့်တစီး ဆိုးရွားစွာ ပျက်စီးခဲ့ပါတယ်။
အဲဒီယာဉ်တိုက်မှုဖြစ်စဉ်အတွင်း ပစ်ကပ်ကားမောင်းနှင်သူတဦး ထိခိုက်ဒဏ်ရာရရှိခဲ့သလို လမ်းဘေးရှိဓာတ်တိုင်နဲ့ လမ်းညွှန်ဆိုင်းဘုတ်တွေလည်း ပျက်စီးသွားခဲ့တာဖြစ်ပါတယ်။
ကနဦးစစ်ဆေးချက်တွေအရ အဲဒီဆယ်ဘီးကားရဲ့ ဘရိတ်စနစ်ချို့ယွင်းမှုကြောင့် ခုလိုအရှိန်လွန်ဝင်တိုက်ခဲ့တာ ဖြစ်နိုင်တယ်လို့ တာဝန်ရှိသူတွေက ယူဆထားပါတယ်။
အခင်းဖြစ်ပွားရာနေရာကို ထိုင်းရဲတပ်ဖွဲ့ဝင်တွေ ချက်ချင်းရောက်ရှိလာပြီး ဆယ် ဘီးကားမောင်းနှင်သူကို ဖမ်းဆီးထိန်းသိမ်းခဲ့ကာ မူးယစ်ဆေးဝါးနဲ့ အရက်သေစာ သောက်စားထားခြင်း ရှိ၊ မရှိ သိနိုင်ဖို့ ဆေးစစ်မှုတွေ ပြုလုပ်သွားမှာ ဖြစ်ပါတယ်။
အဲဒီယာဉ်တိုက်မှုဖြစ်ပွားရတဲ့ အဓိကအကြောင်းရင်းကို ဆက်လက်စုံစမ်းနေဆဲဖြစ်ပြီး ယာဉ်မောင်းကိုဥပဒေနဲ့အညီ အရေးယူသွားမယ်လို့ဆိုပါတယ်။












