Border News Agency
ဖိလစ်ပိုင်၊ နိုဝင်ဘာ ၁၆။
ဖိလစ်ပိုင်နိုင်ငံ၊ မနီလာမြို့မှာ နိုဝင်ဘာလ ၁၅ ရက်နေ့က ကျောင်းသားအဖွဲ့အစည်းတွေနဲ့ ဖိလစ်ပိုင်တက်ကြွလှုပ်ရှားသူတွေပူးပေါင်းပြီး အာဏာသိမ်းစစ်ခေါင်းဆောင်မင်းအောင်လှိုင်ကို ဖမ်းဆီးကာအပြည်ပြည်ဆိုင်ရာ ရာဇဝတ်တရားရုံး (ICC) သို့ ပို့ဆောင်ဖို့ ဆန္ဒပြတောင်းဆိုခဲ့ကြပါတယ်။
Burma Solidarity Philippines (BSP) နဲ့ ဖိလစ်ပိုင်တက္ကသိုလ် ကျောင်းသားအဖွဲ့အစည်း BUKLOD CSSP တို့ စီစဉ်ကျင်းပခဲ့တဲ့ အဲဒီဆန္ဒပြပွဲမှာ ဆန္ဒပြသူတွေဟာ စစ်ခေါင်းဆောင်ကို ဖမ်းဆီးထားတဲ့ ပိုစတာကြီးကို ဖြန့်ခင်းပြသခဲ့ကြပြီး သူနဲ့ထိတွေ့ဆက်ဆံနေတဲ့ အာဆီယံ ၅ နိုင်ငံကိုလည်း ပြင်းပြင်းထန်ထန် ဝေဖန်ရှုတ်ချခဲ့ကြပါတယ်။
အာဆီယံထိပ်သီးအစည်းအဝေး တက်ရောက်လာတဲ့ ခေါင်းဆောင်တွေအနေနဲ့ မင်းအောင်လှိုင်ကို အစည်းအဝေးတက်ခွင့်မပေးတာ မှန်ကန်ပေမယ့် အခြားနေရာတွေမှာ နန်းတော်တံခါးဖွင့်ပေးနေတာဟာ နှစ်မျိုးနှစ်စားကျင့်သုံးနေတာသာဖြစ်ကြောင်း BSP ရဲ့ ဦးဆောင်ညှိနှိုင်းရေးမှူး အီဆာဂါနီ အဘွန်ဒါက ထောက်ပြပြောဆိုခဲ့ပါတယ်။
အဲဒီအပြင် အာဆီယံရဲ့ ဘုံသဘောတူညီချက် ၅ ချက်ဟာ လက်တွေ့ကျတဲ့ ရလဒ်မဖော်ဆောင်ပေးနိုင်ဘဲ အာဏာသိမ်းစစ်တပ် ရဲ့ လူသတ်မှုတွေကို ဖုံးကွယ်ပေးတဲ့အကာအကွယ်တခုအဖြစ်သာ ရှိနေကြောင်းဝေဖန်ခဲ့ပြီး နိုင်ငံတကာနဲ့အာဆီယံခေါင်းဆောင်တွေအနေနဲ့ မြန်မာပြည်သူတွေဘက်က ရပ်တည်မလား၊ စစ်ခေါင်းဆောင်ဘက်က ရပ်တည်မလား ပြတ်ပြတ်သားသား ဆုံးဖြတ်ကြဖို့ တိုက်တွန်းခဲ့ပါတယ်။
မြန်မာနိုင်ငံမှာ အာဏာသိမ်းပြီးနောက်ပိုင်း ပဋိပက္ခနဲ့ အကြမ်းဖက်မှုတွေကြောင့် လူပေါင်း တသိန်းကျော် သေဆုံးခဲ့ရပြီး လူဦးရေ ၄ သန်းနီးပါး နေရပ်စွန့်ခွာခဲ့ရကာ ကုလသမဂ္ဂအစီရင်ခံစာတွေအရလည်း စစ်တပ်လက်ချက်ကြောင့် အရပ်သား ၈,၃၀၀ ကျော် သေဆုံးခဲ့ပါတယ်။










