Border News Agency
မြောက်ဦး၊ နိုဝင်ဘာ ၁၄။
အာရက္ခတပ်တော်(AA)ထိန်းချုပ်ထားတဲ့၊မြောက်ဦးမြို့ရှိ စာသင်ကျောင်းလေကြောင်းတိုက်ခိုက်ခံရမှုဒဏ်ရာရသူထဲက စစ်ရှောင်တဦးဆေးကုသမှုခံယူနေချိန်အတွင်း ထပ်မံသေဆုံးသွားပါတယ်။
အဲဒီစစ်တွေမြို့၊ ကသဲရပ်ကွက်မှ မြောက်ဦးမြို့မှာ စစ်ဘေးရှောင်နေတဲ့ ဦးမောင်သာအေးနဲ့ ဒေါ်ဦးတင်လှိုင်တို့ရဲ့သား အသက်သုံးဆယ်အရွယ်ကိုမင်းဖြိုးထွန်းသေဆုံးသွားတာပါ။
မြောက်ဦးမြို့၊ ကြက်ဈေးရပ်ကွက်ရှိ အခြေခံပညာမူလတန်းလွန်ကျောင်းကို နိုဝင်ဘာလ ၁၂ရက်၊ ည ၈ နာရီအချိန်က အာဏာသိမ်းစစ်တပ်လေကြောင်းတိုက်ခိုက်ခဲ့တာပါ။
အဲဒီလိုလေကြောင်းတိုက်ခိုက်မှုအတွင်း မြောက်ဦးမြို့နယ်၊ မင်္ဂလာစည်ကျေးရွာမှ မနုနုဝင်းနဲ့ ရသေ့တောင်မြို့နယ်၊ ကူတောင်ကျေးရွာမှ ကိုဇော်ဟိန်းသူသေဆုံးသွားခဲ့ပြီး ကလေးငယ်တွေနဲ့ အမျိုးသမီးတွေအပါအဝင် အရပ်သားရှစ်ဦးဒဏ်ရာရရှိခဲ့ပါတယ်။
အဲဒီအပြင် လေကြောင်းတိုက်ခိုက်ခံရမှုဒဏ်ရာရသူထဲမှ ကိုမင်းဖြိုးထွန်းမှာ ဒဏ်ရာပြင်းထန်စွာရရှိခဲ့တာကြောင့် အရေးပေါ်ဆေးကုသမှုခံယူနေချိန် နိုဝင်ဘာလ ၁၄ ရက်၊ ဒီနေ့မနက် ၁၁နာရီမှာ သေဆုံးသွားခဲ့တာဖြစ်ပါတယ်။
မြောက်ဦးမြို့နယ်၊ နန်းကျားကျေးရွာကို နိုဝင်ဘာလ ၅ ရက်နေ့ကလည်း စစ်တပ်လေကြောင်းတိုက်ခိုက်လို့ ကိုယ်ဝန်ဆောင်အမျိုးသမီးတဦးသေဆုံးသွားခဲ့ပြီး ဆယ်ဦးဒဏ်ရာရသွားခဲ့ပါတယ်။
