Border News Agency
တာချီလိတ်၊ အောက်တိုဘာ ၁၆။
ရှမ်းပြည်အရှေ့ပိုင်း၊ တာချီလိတ်မြို့မှာ အောက်တိုဘာလ ၁၄ ရက်နေ့က ငွေကျပ်ခုနှစ် ဘီလီယံရှစ်ရာလေးဆယ့်ငါးသန်းကျော်တန်ဖိုးရှိ စိတ်ပြောင်းဆေးဝါးတွေ ဖမ်းဆီးရမိခဲ့တယ်လို့ မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့က ထုတ်ပြန်ပါတယ်။
တာချီလိတ်မြို့၊ဝမ်ကောင်းရပ်ကွက်နေ စိုင်းငင်း(ခ)အိုက်အေးနဲ့ မနန်းစံဖောင်းတို့ရဲ့ နေအိမ်ကို ညနေ ၃ နာရီ ၃၀ မိနစ်အချိန်ခန့်မှာ ဝင်ရောက်ရှာဖွေခဲ့ပါတယ်။
သူ့တို့ရဲ့နေအိမ်အတွင်းမှကက်တမင်းအဆီရည် နှစ်ဆယ့်ခြောက် ဒသမ တဆယ့်ငါး လီတာ၊ စိတ်ကြွဆေးပြား နှစ်ရာပြားနဲ့ ကက်တမင်းအမှုန့် သုံးဆယ်ဂရမ်တို့ကို သိမ်းဆည်းရမိခဲ့တာပါ။
အဲဒီအပြင် အနံ့ဆေးရည် ကိုးလီတာနဲ့ လက်ကိုင်ဖုန်း လေးလုံးတို့ကိုလည်းသိမ်းဆည်းရမိခဲ့တာဖြစ်ပါတယ်။
ဖမ်းဆီးရမိခဲ့သူအသက် သုံးဆယ့်တနှစ်အရွယ် စိုင်းငင်း(ခ)အိုက်အေးနဲ့ အသက် နှစ်ဆယ့်ကိုးနှစ်အရွယ်မနန်းစံဖောင်းတို့အပေါ် တာချီလိတ်မြို့မရဲစခန်းမှာ မူးယစ်ဆေးဝါးနဲ့စိတ်ကိုပြောင်းလဲစေသောဆေးဝါးဆိုင်ရာဥပဒေအရ အမှုဖွင့်ထားပါတယ်။
