Border News Agency
အမ်း၊ အောက်တိုဘာ ၃၁။
အာရက္ခ-မကွေးအစပ်ရှိ နတ်ရေကန်ဗျူဟာကုန်းပတ်ဝန်းကျင်ကို အာရက္ခတပ်တော် (AA)က ဝိုင်းပတ်ပိတ်ဆို့ထားပြီးအာဏာသိမ်းစစ်တပ်နဲ့ နှစ်ဖက်တိုက်ပွဲတွေနေ့စဉ်ပြင်းထန်နေပါတယ်။
အဲဒီစစ်မျက်နှာတွေမှာ အာဏာသိမ်းစစ်တပ်က ထိုးစစ်တွေ ဆက်လုပ်နေပေမယ့်အထိအခိုက် အကျအဆုံး များပြားနေတာပါ။
”စစ်တပ်ကတော့နတ်ရေကန်ဗျူဟာ မကျသွားအောင်ရိက္ခာရော ခဲယမ်းပါ လေကြောင်းကနေအသည်းအသန် လာချပေးနေရတာပါ။ မြေပြင်မှာတော့ ကိုယ့်ဘက်က လုံးဝဝိုင်းပိတ်ထားတာမို့ စစ်တပ်ဘက်က ရှေ့ဆက်တိုးဖို့ လုံးဝ မလွယ်ကူဘဲ ကျဆုံးမှုတွေ အရမ်းများနေတယ်။”လို့ စစ်ရေးစစ်ရေးသတင်းမြစ်တဦးက Border News Agency ကိုပြောပါတယ်။
အာဏာသိမ်းစစ်တပ်ရဲ့ ထိုးစစ်အရှိန် ကျဆင်းမသွားဘဲရှေ့တိုးဖို့ ကြိုးစားနေတာကို နည်းဗျူဟာမျိုးစုံနဲ့ အကောင်းဆုံး တုံ့ပြန်တိုက်ခိုက်နေတယ်လို့ အာရက္ခတပ်တော်ကဆိုပါတယ်။
ပြီးခဲ့တဲ့ အောက်တိုဘာလ ၂၆ ရက်နေ့ကက စစ်တွေစစ်မျက်နှာရှိ စစ်တပ်ရဲ့ စစ်သင်္ဘောတွေကို အာရက္ခတပ်တော်က တိုက်ခိုက်ဖျက်ဆီးခဲ့သလို အောက်တိုဘာလ ၃၀ ရက်၊ မနက်ပိုင်းကလည်း နတ်ရေကန်ဗျူဟာကုန်းဆီရိက္ခာလာပို့တဲ့ စစ်တပ်ရဲ့ လေကြောင်းထောက်ပံ့ရေး ယာဉ်တစီးကို ထပ်မံပစ်ချနိုင်ခဲ့တာ ဖြစ်ပါတယ်။
”စစ်တွေ စစ်မျက်နှာရော နတ်ရေကန်ဘက်မှာပါတိုက်ပွဲက နေ့တိုင်းလိုလို ပြင်းထန်နေတာပါ။ စစ်တပ်ဘက်က အကျအဆုံးများတော့ လေကြောင်းနဲ့ ရေကြောင်းကိုပဲ အဓိက မှီခိုပြီးတိုက်နေရတာ၊ အခုလို ထောက်ပံ့ရေးယာဉ်တွေပါ ပစ်ချခံရတော့ သူတို့အတွက် ပိုပြီး အကျပ်အတည်းဖြစ်သွားစေတယ်။”လို့ စစ်ရေးသတင်းမြစ်တဦးကလည်း Border News Agency ကိုပြောပါတယ်။
အဲဒီဗျူဟာကုန်းပတ်ဝန်းကျင်မှာ စစ်တပ်ကလေကြောင်းအကူအညီတွေကို ဆက်တိုက်သုံးနေတာကြောင့် နီးစပ်ရာကျေးရွာတွေကို စစ်ဘေးရှောင်နေကြရတယ်လို့လည်း ဒေသခံတွေကဆိုကြ
ပါတယ်။
အာရက္ခတပ်တော် တပ်ဖွဲ့ဝင်တွေကတော့ နောက်မဆုတ်တဲ့ စိတ်ဓာတ်နဲ့ အတက်အဆုတ် ဟန်ချက်ညီညီ ပြောင်းလွယ်ပြင်လွယ်ရှိတဲ့ နည်းဗျူဟာတွေကို အသုံးပြုပြီး အာဏာသိမ်းစစ်တပ်ရဲ့ ထိုးစစ်မှန်သမျှကို ဆက်လက်တုံ့ပြန်တိုက်ခိုက်နေတယ်လို့လည်း အာရက္ခတပ်တော်ကဆိုပါတယ်။
