Border News Agency
ကျောက်တော်၊ အောက်တိုဘာ ၃၁။
မြန်မာနိုင်ငံမှာအာဏာသိမ်းစစ်တပ်ရဲ့ လေကြောင်းတိုက်ခိုက်မှုတွေနဲ့ စစ်ကြောရေး ရာဇဝတ်မှုတွေ ပိုများပြားလာတာကြောင့် အရှိန်မြှင့် စုံစမ်းစစ်ဆေးနေတယ်လို့ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှုယန္တရား (IIMM) အကြီးအကဲနီကိုလက်စ်ခွန်ဂျန်က (၈၁) ကြိမ်မြောက် ကုလသမဂ္ဂအထွေထွေညီလာခံ၊ တတိယကော်မတီအစည်းအဝေးမှာ ပြောကြားခဲ့ပါတယ်။
အာဏာသိမ်းစစ်တပ်ဟာ လေကြောင်းတိုက်ခိုက်မှုတွေကို ပိုမိုအားထားလာပြီး အရပ်သားတွေရှိတဲ့ နေအိမ်တွေ၊ ဆေးရုံတွေ၊ စာသင်ကျောင်းတွေနဲ့ ဘာသာရေး အဆောက်အအုံတွေကို ပစ်မှတ်မရှောင်ဘဲ တိုက်ခိုက်နေတာပါ။
အဲဒီအပြင် စစ်တပ်ရဲ့ ထိန်းသိမ်းရေးစခန်းတွေမှာ ကျူးလွန်နေတဲ့ လိင်ပိုင်းဆိုင်ရာ ဖိနှိပ်မှု၊ လျှပ်စစ်ရှော့တိုက် ညှဉ်းပန်းနှိပ်စက်မှုတွေနဲ့ ပတ်သက်တဲ့ သက်သေထွက်ဆိုချက်တွေကိုလည်းရရှိထားပြီး တာဝန်ရှိတဲ့ တပ်မှူးတွေကို ဖော်ထုတ်နေတယ်လို့ဆိုပါတယ်။
စစ်တပ်ကို ဆန့်ကျင်တိုက်ခိုက်နေတဲ့ လက်နက်ကိုင်အဖွဲ့အစည်းတွေရဲ့ ရက်စက်ကြမ်းကြုတ်တဲ့ ရာဇဝတ်မှု စွပ်စွဲချက်တွေကိုလည်း ကျူးလွန်သူမည်သူဖြစ်တယ်ဆိုတာကို မခွဲခြားဘဲ အထောက်အထားအပေါ် အခြေခံပြီး စုံစမ်းစစ်ဆေးနေတယ်လို့လည်းဆိုပါတယ်။
ယန္တရားအနေနဲ့အနာဂတ် တရားစွဲဆိုမှုတွေမှာ ပံ့ပိုးနိုင်ဖို့အတွက် အထောက်အထား ရင်းမြစ် ၁,၆၀၀ ကျော်ဆီမှ ဗီဒီယို၊ ဓာတ်ပုံ၊ ဂြိုလ်တုပုံရိပ်တွေနဲ့ သက်သေထွက်ဆိုချက် ၇၅၀ ကျော်ကို စုဆောင်းထားပြီးဖြစ်တာပါ။
စုဆောင်းရရှိထားတဲ့ အချက်အလက်တွေကို နိုင်ငံတကာရာဇဝတ်ခုံရုံး (ICC)၊ နိုင်ငံတကာတရားရုံး (ICJ) နဲ့ အာဂျင်တီးနား ဖက်ဒရယ်တရားရုံးတို့အပါအဝင် သက်ဆိုင်ရာ တရားရေးအာဏာပိုင်တွေထံ မျှဝေပေးထားတယ်လို့လည်းဆိုပါတယ်။
ကုလသမဂ္ဂအဖွဲ့ဝင် နိုင်ငံတွေအနေနဲ့ မြန်မာနိုင်ငံမှ ထိခိုက်နစ်နာသူတွေကို ပစ်ပယ်ထားမှာ မဟုတ်သလို အခုလိုစစ်ရာဇဝတ်မှုတွေကိုလည်း လက်သင့်ခံမှာ မဟုတ်ကြောင်း ပြတ်သားတဲ့ သတင်းစကားပေးဖို့ လိုအပ်တယ်လို့နီကိုလက်စ်ခွန်က တိုက်တွန်းပြောဆိုခဲ့ပါတယ်။
