မြန်မာနိုင်ငံမှာ စားနပ်ရိက္ခာအကူအညီပေးနေတဲ့ ကုလသမဂ္ဂကမ္ဘာ့စားနပ်ရိက္ခာအစီအစဉ်(WFP)ဟာ လာမယ့်ဧပြီ လကစတင်ပြီး အာရက္ခဒေသက စစ်ဘေးရှောင်တသိန်းအပါအဝင်လူဦးရေတသန်းကျော်အတွက် စားနပ်ရိက္ခာအကူအညီပေးမှုတွေ ရပ်ဆိုင်းတော့မယ်လို့ ထုတ်ပြန်ပါတယ်။
အဲဒီကုလသမဂ္ဂကမ္ဘာ့စားနပ်ရိက္ခာအစီအစဉ်(WFP)ရဲ့အထောက်အပံ့ကိုသာအားထားနေရတဲ့ ရိုဟင်ဂျာအသိုင်းအဝိုင်းတွေအပါအဝင်လူပေါင်းတသန်းကျော်ထိခိုက်လာမယ်လို့ မတ်လ ၁၄ ရက်၊ဒီနေ့မှာကုလသမဂ္ဂကမ္ဘာ့စားနပ်ရိက္ခာအစီအစဉ် (WFP)က ထုတ်ပြန်ပါတယ်။
မြန်မာနိုင်ငံအတွင်း ပဋိပက္ခတွေ၊နေရပ်စွန့်ခွာရွှေ့ပြောင်းတာတွေနဲ့သွားရောက်ကူညီခွင့်ကန့်သတ်ချက်တွေ တိုးလာတာကြောင့် စားနပ်ရိက္ခာအကူအညီလို အပ်ချက်တွေ ပိုများလာတဲ့အချိန်မှာ ခုလိုမျိုးအထောက်အပံ့ရပ်ဆိုင်းရတာဖြစ်တယ်လို့ဆိုပါတယ်။
အဲဒီလိုရန်ပုံငွေအသစ်မရှိရင် ထိခိုက်လွယ်မှုအများဆုံးဖြစ်ကြတဲ့ အသက်ငါးနှစ်အောက် ကလေးတွေ၊ကိုယ်ဝန်ဆောင်မိခင်တွေ၊နို့တိုက်မိခင်တွေနဲ့မသန်စွမ်းသူဦးရေ သုံးသောင်းငါးထောင်ခန့်ကိုသာ ကူညီထောက်ပံ့ပေးသွားမယ်လို့ဆိုပါတယ်။
“အခုဖြစ်လာမယ့်အကူအညီရပ်ဆိုင်းမှုတွေဟာ အသက်ရှင်သန်ရေးအတွက် WFP အကူအညီတခုတည်းကိုသာအားထားနေကြရတဲ့ နိုင်ငံတဝှမ်းကထိခိုက်လွယ်ရပ်ရွာလူထုတွေအတွက် ပြင်းပြင်းထန်ထန်ဆိုးရွားဆိုးရွားရိုက်ခတ်နိုင်ပါတယ်။” လို့ WFP ရဲ့ မြန်မာနိုင်ငံဆိုင်ရာဌာနေကိုယ်စားလှယ် Michael Dunford က ဆိုပါတယ်။
မြန်မာပြည်သူပြည်သားတွေအားလုံးအတွက် အသက်ကယ်ဆယ်ရေးရိက္ခာအထောက်အပံ့တွေ ဆက်ပြီးပေးနိုင်ဖို့အမေရိကန်ဒေါ်လာသန်းခြောက်ဆယ်အရေးတကြီးလိုအပ်နေတယ်လို့လည်း ဆိုပါတယ်။
“ကျွန်တော်တို့ WFP အနေနဲ့ကတော့မြန်မာပြည်သူပြည်သားတွေကို ထောက်ပံ့ကူညီသွားမယ်ဆိုတဲ့ကတိကဝတ်အတိုင်း ဆက်လက်ကြိုးစားလုပ်ဆောင်နေမှာဆိုပေမဲ့လည်း အကူအညီတကယ်လိုအပ်နေတဲ့သူတွေဆီအကူအညီတွေဆက်လက်ပေးပို့နိုင်ဖို့ရာရန်ပုံငွေတွေ ချက်ချင်းလက်ငင်းရရှိဖို့ အရေးကြီးပါတယ်။” လို့ WFP ရဲ့ မြန်မာနိုင်ငံဆိုင်ရာဌာနေကိုယ်စားလှယ် Michael Dunford က ဆိုပါတယ်။
WFP ဟာ စားနပ်ရိက္ခာလိုအပ်မှု အမြင့်ဆုံးဖြစ်ပြီးအခက်ခဲဆုံးရာသီချိန်ဖြစ်တဲ့ ဇူလိုင်လမှစက်တင်ဘာလအတွက်အရေးပေါ်အစီအစဥ်တွေအနေနဲ့အဲဒီလတွေမှာ စားနပ်ရိက္ခာပြတ်တောက်နိုင်မယ့်လူဦးရေသုံးသိန်းကို ပြန်ပြီးအထောက်အပံံ့တွေပေးနိုင်ဖို့ ကြိုးစားသွားမယ်လို့ဆိုပါတယ်။
မြန်မာနိုင်ငံလူသားချင်းစာနာမှုဆိုင်ရာ လိုအပ်ချက်တွေနဲ့ တုံ့ပြန်ရေးအစီအစဉ်အရ မြန်မာနိုင်ငံမှာလူဦးရေ ၁၅ ဒဿ မ ၂ သန်းခန့်ဟာ တနေ့တာစားနပ်ရိက္ခာလိုအပ်ချက်တွေကိုမလုံလောက်တာတွေကြုံနေကြရပြီးမနှစ်ကလူဦးရေ ၁၃ ဒဿမ ၃ သန်း တိုးလာနေတယ်လို့ဆိုပါတယ်။
အဲဒီအထဲမှာလူဦးရေ ၂ ဒဿမ ၃ သန်းဟာ ဆာလောင်ငတ်မွက်မှာဒဏ်ကို ရင်ဆိုင်နေကြရပြီ WFP ရဲ့ ပုံမှန်ပံ့ပိုးကူညီမှုရနေတာတောင် ထမင်းနပ်မှန်မစားရတဲ့သူတွေရှိနေတယ်လို့ဆိုပါတယ်။
အာရက္ခတပ်တော်(AA) သိမ်းပိုက်ထိန်းချုပ်ထားတဲ့ မောင်တောမြို့မှာလည်းဟိန္ဒူဘာသာဝင်တွေဟာ စားနပ်ရိက္ခာ၊ဆေးဝါးအကူအညီတွေ လိုအပ်နေကြတယ်လို့ ဟိန္ဒူဘာသာဝင်တွေက ဆိုကြပါတ ယ်။
အဲဒီမောင်တောမြို့နယ်မှာ ဟိန္ဒူဘာ သာဝင်လေးထောင်ကျော်ထိရှိနေပြီးအများစုဟာ အလုပ်အကိုင်တွေမရှိကြသေးဘူးလို့ ဆိုကြပါတယ်။
သူတို့တွေဟာ နိုင်ငံတကာလူသားချင်းစာနာထောက်ထားမှုဆိုင်ရာအကူအညီတွေမရကြသလို အာရက္ခတပ်တော်ဆီကလည်း အကူအညီတွေမရကြတာမို့ စားဝတ်နေရေးအခက်အခဲနဲ့ရင်ဆိုင်နေကြရတယ်လို့ ဟိန္ဒူဘာသာဝင်တွေ ကဆိုကြပါတယ်။
“စားဖို့၊သောက်ဖို့ အခက်အခဲရှိတယ်။အလုပ်အကိုင်လည်းမရှိဘူး။ဆန်တသိုက်စားရမယ့်နေရာမှာ နှစ်ဗူးလုပ်လို့စားရတယ်။နှစ်ဗူးစားတာမှာ တဗူးလုပ်လို့စားနေရတယ်။အဲလိုအခက်အခဲတွေဖြစ်နေပါတယ်။အဲဒါတွေကိုကူညီပေးစေချင်ပါတယ်။လူတွေကအလုပ်အကိုင်လည်း အဆင်မပြေဘူး။စားဝတ်နေရေးနဲ့အများကြီးဒုက္ခရောက်နေကြတယ်။” လို့ မောင်တောမြို့မှဟိန္ဒူဘာသာဝင်အမျိုးသမီးတဦးက Border News Agency ကိုပြောပါတယ်။
အာရက္ခဒေသမှာနိုင်ငံတကာလူသားချင်းစာနာထောက်ထားမှုဆိုင်ရာအကူအညီပေးရေးအဖွဲ့တွေအများကြီးရှိနေပေမယ့် ရုံးအားလုံးကို ပိတ်ထားကြပြီး စစ်ဘေးရှောင်ထွက်သွားကြပြီမို့ နိုင်ငံ တကာလူသားချင်းစာနာထောက်ထားမှုဆိုင်ရာအကူအညီပေးရေးအဖွဲ့တွေရဲအကူအညီတွေလည်းရပ်တန့်နေတယ်လို့ အာရက္ခပြည်သူတွေက ဆိုကြပါတယ်။
အာရက္ခတပ်တော်ထိန်းချုပ်နယ်မြေတွေမှာ အာရက္ခပြည်သူ့တော်လှန်ရေးအစိုးရအဖြစ် အုပ်ချုပ်ရေးယန္တရားတွေ ဖော်ဆောင်နေပြီး ပြည်လည်တည်ဆောက်ရေးတွေ ဆောင်ရွက်နေသလို လူသားချင်းစာနာထောက်ထားရေးနဲ့ဖွံ့ဖြိုးရေးဆိုင်ရာပူးပေါင်းဆောင်ရွက်ရေးရုံး(HDCO)တွေ ဖွင့်လှစ်ဆောင်ရွက်ပေးနေပေမယ့် လိုအပ်ချက်တွေ အများကြီးရှိနေသေးတယ်လို့ အာရက္ခပြည်တွေကဆိုကြပါတယ်။
