Border News Agency
မကွေး၊ ဇန်နဝါရီ ၂၆။
မကွေးတိုင်း၊ ပေါက်မြို့နယ်အတွင်းရှိ စစ်ဘေးရှောင်စခန်းတွေမှာ ရေမသန့်ရှင်းတာတွေကြောင့် ကလေးငယ်တွေအပါအဝင် လူပေါင်းတစ်ထောင်ခန့် အရေပြားရောဂါ ပြင်းထန်စွာခံစားနေရပြီး ဆေးဝါးနဲ့ ရိက္ခာအကူအညီတွေအရေးပေါ်လိုအပ်နေပါတယ်။
အဲဒီအရေပြားရောဂါဟာ ကာလရှည် နေရပ်စွန့်ခွာနေရတဲ့ စစ်ဘေးရှောင်တွေကြား ရေမသန့်ရှင်းမှုနဲ့ တကိုယ်ရေသန့်ရှင်းမှု အားနည်းချက်တွေကြောင့်ဖြစ်တယ်သိရပါတယ်။
အဲဒါကြောင့် အစုလိုက်အပြုံလိုက် ကူးစက်ဖြစ်ပွားနေတာဖြစ်တယ်လို့ ပေါက်မြို့နယ် ပြည်သူ့အုပ်ချုပ်ရေးအဖွဲ့ (ပအဖ)က ထုတ်ပြန်ထားပါတယ်။
အဲဒီပေါက်မြို့နယ်အတွင်းရှိ ကျေးရွာဆယ့်တရွာမှ အိမ်ထောင်စုတထောင်ကျော် စစ်ဘေးရှောင်ဦးရေငါးထောင်နီးပါးဟာ စားနပ်ရိက္ခာ၊ သန့်ရှင်းတဲ့သောက်သုံးရေ၊ အမိုးအကာနဲ့ ဆေးဝါးလိုအပ်ချက် မြင့်မားနေတဲ့ ဒုက္ခနဲ့ရင်ဆိုင်နေရတာပါ။
အဲဒီရောဂါဖြစ်ပွားနေသူတွေကို ကုသပေးနိုင်ဖို့အတွက် ဒေသတွင်း ဆေးဝါးလုံလောက်မှု မရှိတော့တာကြောင့်အရေပြားရောဂါအတွက် လိုအပ်တဲ့ဆေးဝါးတွေနဲ့ အခြေခံကျန်းမာရေးသုံးပစ္စည်းတွေကို ဝိုင်းဝန်းကူညီကြဖို့တောင်းဆိုထားပါတယ်။
စစ်ဘေးရှောင်ပြည်သူတွေဟာ ကာလရှည်ကြာစွာ စစ်ဘေးတိမ်းရှောင်နေရတာကြောင့် ကိုယ်ခံအားနည်းနေချိန်မှာ အခုလိုကူးစက်ရောဂါတွေပါ ထပ်မံရင်ဆိုင်နေရတာဖြစ်လို့ အကူအညီတွေအရးတကြီးလိုအပ်နေတာလို့ သိရပါတယ်။
