Border News Agency
ပါကစ္စတန်နိုင်ငံ၊ဖေဖော်ဝါရီ ၂၀။
ပါကစ္စတန်နိုင်ငံ၊ ကရာချီမြို့ရှိ လူနေထူထပ်ရာ Soldier Bazaar ရပ်ကွက်မှာ ဖေဖော်ဝါရီလ ၁၉ ရက်၊ မနက်အစောပိုင်းက ပြင်းထန်တဲ့ ဓာတ်ငွေ့ယိုစိမ့်ပေါက်ကွဲမှုတစ်ခု ဖြစ်ပွားခဲ့ပါတယ်။
အဲဒီပေါက်ကွဲမှုကြောင့် လူနေအဆောက်အအုံတခု ပြိုကျပျက်စီးခဲ့ရာ အနည်းဆုံး လူ ၁၆ ဦး သေဆုံးပြီး အများအပြား ဒဏ်ရာရသွားခဲ့တယ်လို့ ဒေသတွင်းအာဏာပိုင်တွေက အတည်ပြုထားပါတယ်။
အဲဒီပေါက်ကွဲမှုဟာ လူတွေအိပ်မောကျနေတဲ့ ဒေသစံတော်ချိန်မနက် ၄ နာရီ ၁၅ မိနစ်အချိန်ခန့်မှာ Gul Rana Colony ရှိ သုံးထပ်တိုက် အဆောက်အအုံရဲ့ ပထမထပ်မှာ စတင်ဖြစ်ပွားခဲ့တာပါ။
အဲဒီလိုပေါက်ကွဲမှုကြောင့် အဆောက်အအုံတခြမ်းလုံး ပြိုကျပျက်စီးခဲ့သလို အနီးနားရှိအဆောက်အအုံအချို့လည်း ထိခိုက်မှုတွေ ရှိခဲ့တယ်လို့ဆိုပါတယ်။
လက်ရှိမှာ ကယ်ဆယ်ရေးအဖွဲ့တွေက အပျက်အစီးတွေအောက်မှာ ပိတ်မိနေသူတွေကိုရှာဖွေနေပြီး သေဆုံးသူအရေအတွက်ဟာ ၂၀ ဦးခန့်အထိ ရှိလာနိုင်တယ်လို့ ဆေးရုံသတင်းရင်းမြစ်တွေက ခန့်မှန်းထားပါတယ်။
အဲဒီ သေဆုံးသူတွေထဲမှာ အမျိုးသမီးနဲ့ ကလေးငယ်တွေလည်းပါဝင်နေပြီး အဆောက်အအုံအတွင်းရှိ သဘာဝဓာတ်ငွေ့ပိုက်လိုင်း ယိုစိမ့်ရာကနေတဆင့် ပေါက်ကွဲမှုဖြစ်ပွားခဲ့တာလို့ စစ်ဆေးချက်တွေအရ သိရပါတယ်။
ပါကစ္စတန်ရဲ့ အကြီးဆုံးမြို့ဖြစ်တဲ့ ကရာချီမှာ ဓာတ်ငွေ့လိုင်းစနစ်တကျ မရှိတာနဲ့အတူပေါ့ဆမှုတွေကြောင့် အခုလို ပေါက်ကွဲမှုတွေ မကြာခဏဖြစ်ပွားလေ့ရှိတယ်လို့သိရပါတယ်။
ဒါ့အပြင် အဆောက်အအုံဆိုင်ရာ စည်းမျဉ်းတွေလိုက်နာမှုအားနည်းတာ၊ ခွင့်ပြုချက်မရှိဘဲ အထပ်တိုးချဲ့ဆောက်တာနဲ့ ဟောင်းနွမ်းနေတဲ့ အဆောက်အအုံတွေကို ပြုပြင်ထိန်းသိမ်းမှုမရှိတာတွေဟာ အခုလိုဆိုးကျိုးတွေကို ဖြစ်စေတာလို့ ကျွမ်းကျင်သူတွေက ဝေဖန်ထောက်ပြထားပါတယ်။
