Border News Agency
ထိုင်း၊ မေ ၄။
ထိုင်းနိုင်ငံ၊ ချင်းရိုင်းခရိုင်၊ ချင်းသန်းမြို့နယ်အတွင်းက မဲခေါင်မြစ်ကမ်းဘေး အများပြည်သူသုံးလမ်းပေါ်မှာ တရားမဝင် ဝင်ရောက်လာတဲ့ တရုတ်နိုင်ငံသား ၄ ဦးကို မေလ ၃ ရက်၊ညပိုင်းက ဖမ်းဆီးရမိခဲ့တယ်လို့ ထိုင်းနယ်ခြားစောင့်တပ်ထုတ်ပြန်ပါတယ်။
အဲဒီ နယ်ခြားစောင့်တပ်ဖွဲ့ဟာ သတင်းပေးချက်အရ ချင်းသန်းမြို့နယ်၊မဲငွေကျေးရွာအုပ်စုအတွင်းက သဘာဝပေါက်လမ်းတွေကို စောင့်ကြည့်နေစဉ် မသင်္ကာဖွယ် လူ ၄ ဦးကို မြစ်ကမ်းပါးပေါ်မှာ တွေ့ရှိခဲ့တာကြောင့် စစ်ဆေးရာကနေ ဖမ်းဆီးရမိခဲ့တာပါ။
အဲဒီ ဖမ်းဆီးရမိသူတွေဟာ တရုတ်နိုင်ငံသား ၄ ဦးဖြစ်ပြီး သူတို့မှာထိုင်းနိုင်ငံအတွင်း ဝင်ရောက်နေထိုင်ခွင့် အထောက်အထား တစုံတရာ မရှိတာကြောင့် တရားမဝင် ဝင်ရောက်မှုနဲ့ အမှုဖွင့် အရေးယူခံထားရပါတယ်။
အဲဒီ ဖမ်းဆီးရမိသူတွေကို ချင်းသန်းမြို့နယ် လူဝင်မှုကြီးကြပ်ရေးဌာနနဲ့ နယ်မြေခံရဲစခန်းဆီ ပို့ဆောင်ကာ ဥပဒေအရ အရေးယူနိုင်ဖို့ ဆောင်ရွက်နေတယ်လို့ သိရပါတယ်။
သက်ဆိုင်ရာ တာဝန်ရှိသူတွေအနေနဲ့ အဲဒီတရုတ်နိုင်ငံသားတွေ ဝင်ရောက်လာတဲ့ လမ်းကြောင်းနဲ့ ပတ်သက်သူတွေကို ဖော်ထုတ်နိုင်ဖို့အတွက် ဆက်လက်စုံစမ်း စစ်ဆေးနေပါတယ်။
