Border News Agency
မလေးရှား၊ မေ ၄။
မလေးရှားနိုင်ငံ၊ ဂျိုဟိုးပြည်နယ် လူဝင်မှုကြီးကြပ်ရေးဌာနဟာ ပီကန်နီနက်စ်ထိန်းသိမ်းရေးစခန်းမှာ ပြစ်ဒဏ်ကျခံပြီးတဲ့ မြန်မာနိုင်ငံသား ၁၀၄ ဦး အပါအဝင် နိုင်ငံခြားသား စုစုပေါင်း ၂၃၂ ဦးကို ပြီးခဲ့တဲ့ ဧပြီလနောက်ဆုံးပတ်အတွင်း နေရပ်နိုင်ငံအသီးသီးသို့ ပြန်လည်ပို့ဆောင်ခဲ့တယ်လို့သိရပါတယ်။
အခုလိုပြန်လည်ပို့ဆောင်ရာမှာ မြန်မာနိုင်ငံသား ၁၀၄ ဦးနဲ့အတူအင်ဒိုနီးရှား၊ပါကစ္စတန်၊ အိန္ဒိယ၊ ဗီယက်နမ်နဲ့ တရုတ်နိုင်ငံသားတွေလည်း ပါဝင်ပြီး သူတို့ကိုလေဆိပ်တွေနဲ့ ကူးတို့ဆိပ်တွေကတဆင့် စနစ်တကျ ပြန်လည်စေလွှတ်ခဲ့တာပါ။
အဲဒီ နေရပ်ပြန်ပို့ခံရသူတွေဟာ ပတ်စပို့ရှိသူတွေနဲ့ သံရုံးက ထုတ်ပေးထားတဲ့ ယာယီခရီးသွားလက်မှတ် (CI/ETD) ရှိသူတွေဖြစ်ပြီး သူတို့အားလုံးကို နာမည်ပျက်စာရင်းသွင်းလိုက်တာကြောင့် သတ်မှတ်ကာလအတွင်း မလေးရှားသို့ ပြန်ဝင်ခွင့်ရမှာ မဟုတ်ပါဘူး။
ဂျိုဟိုးလဝကအနေနဲ့ ထိန်းသိမ်းရေးစခန်းမှာ လူဦးရေ ပုံမလာစေဖို့အတွက် အခုလို စီစဉ်တာဖြစ်ပြီး နေရပ်ပြန်ပို့ခြင်းဆိုင်ရာ ကိစ္စရပ်တွေအတွက် ဘယ်လိုဝန်ဆောင်မှုခမှ ပေးဆောင်ဖို့ မလိုဘူးလို့လည်း အသိပေးထားပါတယ်။
ဒါ့အပြင် အသေးစိတ်သိရှိလိုသူတွေအနေနဲ့ သက်ဆိုင်ရာ မှတ်တမ်းနဲ့ ပြောင်းရွှေ့ရေးဌာန ဖုန်းနံပါတ် 07-6993540 သို့မဟုတ် အွန်လိုင်းစနစ်ကတဆင့် တိုက်ရိုက်ဆက်သွယ် မေးမြန်းနိုင်တယ်လို့ဆိုပါတယ်။
