Border News Agency
ထန်းတပင်၊မေ ၈။
စစ်တောင်းမြစ်အရှေ့ဘက်ခြမ်း၊ထန်းတပင်မြို့နယ်ထဲကကျေးရွာတွေကို အာဏာသိမ်းစစ်တပ်က မေလ ၇ ရက်၊မနေ့ကလေကြောင်းတိုက်ခိုက်ခဲ့တာကြောင့် ကလေးငယ် ၃ ဦးအပါအဝင် အပြစ်မဲ့ပြည်သူအများအပြား သေဆုံးခဲ့တယ်လို့ ဒေသခံတွေကဆိုကြပါတယ်။
အဲဒီထန်းတပင်မြို့နယ်၊ဖွားအိမ်စုရွာကို အာဏာသိမ်းစစ်တပ်က လေကြောင်းမှ ၅ ကြိမ်ထိတိုက်ခိုက်ခဲ့တယ်လို့ဆိုပါတယ်။
အဲဒီအပြင် အသက်လုပြီးထွက်ပြေးဖို့ ကြိုးစားနေတဲ့ ပြည်သူတွေရှိရာ ရှားပင်ချောင်နဲ့ ဖွားအိမ်စုလှေဆိပ်တွေကိုပါ ထပ်ပြီးတိုက်ခိုက်ခဲ့တာကြောင့် လှေဆိပ်မှာတင် သေဆုံးသူတွေရှိခဲ့တယ်လို့ ရွာသားတွေကဆိုကြပါတယ်။
အဲဒီ ဖွားအိမ်စုကျေးရွာဟာ ဧပြီလ ၆ ရက်နေ့ကလည်း အာဏာသိမ်းစစ်တပ်လေကြောင်းတိုက်ခိုက်ခဲ့တာကြောင့် ရွာလုံးကျွတ်နီးပါး ပျက်စီးနေသလို လူသေဆုံးမှုလည်း များပြားခဲ့တယ်လို့ဆိုပါတယ်။
အဲဒီနေ့မှာလည်း အသက်လုပြီး ပြေးဖို့ပြင်နေတဲ့ ပြည်သူတွေကိုမှ လှေဆိပ်အထိ လိုက်လံပစ်ခတ်ခဲ့တယ်လို့လည်းဆိုပါတယ်။
အာဏာသိမ်းစစ်တပ်ဟာ လေကြောင်းတိုက်ခိုက်တာအပြင် လက်နက်ကြီးတွေနဲ့ပါ ပစ်ခတ်နေတာကြောင့် ဒေသခံတွေဟာ အိုးအိမ်စွန့်ခွာပြီး ဘေးလွတ်ရာကို ခက်ခက်ခဲခဲ ထွက်ပြေးနေကြရတယ်လို့ ဆိုကြပါတယ်။
