Border News Agency
မလေးရှား၊ မေ ၂၁။
မလေးရှားနိုင်ငံ၊ ကွာလာလမ်ပူမြို့ကနေ ဂျိုဟိုးမြို့ကို မောင်းလာတဲ့ခရီးသည်တင် အဝေးပြေးမှန်လုံဘတ်စ်ကားတစီးဟာ မေလ ၂၁ ရက်၊ ဒီနေ့ နေ့လည်ပိုင်းက PLUS အဝေးပြေးလမ်းမကြီးပေါ်မှာ ရုတ်တရက်မီးလောင်ပြီး လမ်းဘေးအတားအဆီးတွေကို တိုက်မိတိမ်းမှောက်မှု ဖြစ်ပွားခဲ့ပါတယ်။
အဲဒီဘတ်စ်ကားပေါ်မှာယာဉ်မောင်းတဦး၊ ကလေးငယ်တဦးနဲ့လူကြီးခရီးသည် ၁၅ ဦး၊ စုစုပေါင်း ၁၇ ဦး လိုက်ပါလာတာဖြစ်ပြီး ကံကောင်းထောက်မစွာပဲအားလုံးအချိန်မီ ဘေးကင်းရုန်းထွက်နိုင်ခဲ့ကြလို့ ထိခိုက်ဒဏ်ရာရတာနဲ့ သေဆုံးတာမျိုးမရှိခဲ့ဘူးလို့ မီးသတ်တပ်ဖွဲ့ကပြောပါတယ်။
အဲဒီဖြစ်စဉ်ဟာ ကားရဲ့နောက်ဘီးတာယာကနေ စတင်မီးလောင်ခဲ့တာဖြစ်ပြီး အဲဒီနောက်ယာဉ်မောင်းကကားကိုမထိန်းနိုင်တော့ဘဲ လမ်းလယ်အတားအဆီးတွေကို ဝင်တိုက်မိခဲ့တာလို့ကနဦးသိရပါတယ်။
မီးသတ်တပ်ဖွဲ့ဝင်တွေ အခင်းဖြစ်နေရာကို ရောက်ရှိလာချိန်မှာတော့ ဘတ်စ်ကားတစီးလုံးရဲ့ ၈၀ ရာခိုင်နှုန်းခန့် မီးလောင်ပျက်စီးနေပြီဖြစ်ပါတယ်။
အဲဒီမတော်တဆမှုကြောင့် အဝေးပြေးလမ်းမကြီးပေါ်မှာ ၅ ကီလိုမီတာကျော်အထိ ယာဉ်ကြောပိတ်ဆို့မှုတွေဖြစ်ပွားခဲ့ပြီး ဘတ်စ်ကားကုမ္ပဏီဘက်ကတော့ ခရီးသည်တွေခရီးစဉ်ဆက်နိုင်ဖို့အတွက် တခြားကားတစီးနဲ့လာရောက်ပြောင်းရွှေ့ ခေါ်ဆောင်သွားပေးခဲ့တယ်လို့ သိရပါတယ်။
