Border News Agency
ချင်းဒါအို၊ ဇူလိုင် ၂၀။
ထိုင်း-မြန်မာနယ်စပ်၊ချင်းမိုင်ခရိုင်၊ချင်းဒါအိုမြို့နယ်၊မောင်းနကျေးရွာအုပ်စု နယ်မြေမှာ ဇူလိုင်လ ၁၉ ရက်နေ့က မူးယစ်ဆေးပြား သန်းနဲ့ချီ သိမ်းဆည်းရမိခဲ့တယ်လို့ ထိုင်းစစ်တပ်က ထုတ်ပြန်ပါတယ်။
အဲဒီ မောင်းနကျေးရွာအုပ်စုမှာ ဇူလိုင်လ ၁၇ ရက်နေ့က နယ်မြေရှင်းလင်းရေး လုပ်ချိန်မူးယစ်မှောင်ခိုအဖွဲ့နဲ့ တိုက်ပွဲဖြစ်ပွားခဲ့ပြီးနောက် ကျောပိုးအိတ် ပြုလုပ်ထားတဲ့ ဆာလာအိတ် သုံးဆယ်ခုနှစ်အိတ်ကို ပထမအကြိမ် စတင်သိမ်းဆည်းရမိခဲ့တာပါ။
အဲဒီဆာလာအိတ်တွေထဲကနေ စိတ်ကြွရူးသွပ်ဆေးပြားခုနှစ်ဒသမခုနှစ်သန်းကျော်ကို စတင်တွေ့ရှိခဲ့တာ ဖြစ်ပါတယ်။
အဲဒီနောက် ဇူလိုင်လ ၁၉ ရက်နေ့မှာ တိုက်ပွဲဖြစ်ပွားခဲ့တဲ့ နေရာဝန်းကျင်ကို ထပ်မံစစ်ဆေးရာ ဆာလာအိတ်လေးအိတ်နဲ့ စိတ်ကြွဆေးပြားရှစ်သိန်းခွဲကျော်ကို ထပ်မံတွေ့ရှိခဲ့ပါတယ်။
အဲဒါကြောင့် စုစုပေါင်း စိတ်ကြွဆေးပြားရှစ်ဒသမခြောက်သန်းကျော်ကို သိမ်းဆည်းရမိခဲ့ပြီး လက်ရှိမှာတော့တရားဥပဒေအတိုင်း အရေးယူနိုင်ဖို့ နာဝိုင်ရဲစခန်းဆီ လွှဲပြောင်းပေးထားပါတယ်။
