Border News Agency
နီပေါ၊ စက်တင်ဘာ ၁။
နီပေါနိုင်ငံနဲ့တရုတ်နိုင်ငံနယ်စပ်အနီးမှာဖြစ်ပွားခဲ့တဲ့ ရုတ်တရက်ရေကြီးရေလျှံမှုနဲ့ မြေပြိုမှုတွေကြောင့် သေဆုံးသူ ဦးရေ ၉၅၅ ဦးထိမြင့်တက်လာပြီး လူပေါင်း ၄,၄၇၁ ဦး ပျောက်ဆုံးနေဆဲဖြစ်ပါတယ်။
နီပေါသဘာဝဘေးအန္တရာယ်ဆိုင်ရာ အာဏာပိုင်အဖွဲ့ရဲ့ထုတ်ပြန်ချက်အရ နီပေါနိုင်ငံအတွင်းသေဆုံးသူ ၉၃၉ ဦး ရှိလာပြီး ပျောက်ဆုံးနေသူ ၃,၉၂၅ ဦးရှိတဲ့ထဲ နိုင်ငံခြားသား ၅၉၂ ဦး ပါဝင်နေပါတယ်။
အဲဒီအပြင် နူဝါကုတ် (Nuwakot) နဲ့ ရသူဝါ (Rasuwa) ခရိုင်တို့မှာ ထိခိုက်ပျက်စီးမှုအဆိုးရွားဆုံးဖြစ်ခဲ့ပြီး ပျောက်ဆုံးနေသူတွေထဲမှာ တပ်မတော်သား၊ ရဲတပ်ဖွဲ့ဝင်နဲ့အကောက်ခွန်ဝန်ထမ်းတွေလည်း ပါဝင်နေတာပါ။
တရုတ်နိုင်ငံဘက်ခြမ်းတိဘက်ဒေသမှာလည်း သေဆုံးသူ ၁၆ ဦး ရှိကြောင်းအတည်ပြုထားပြီး နယ်စပ်နှစ်ဘက်စလုံးမှာ ပျောက်ဆုံးနေသူ အများစုဟာ ရေအားလျှပ်စစ်စီမံကိန်းတွေက အလုပ်သမားတွေဖြစ်ကြပါတယ်။
အဲဒီအပြင်အိန္ဒိယနိုင်ငံ၊ ဥတ္တာပရာဒေးရှ်ပြည်နယ်ထဲက မြစ်တွေအတွင်းမှလည်း နီပေါဘက်ကမျောပါလာတယ်လို့ ယူဆရတဲ့ရုပ်အလောင်း ၁၇ လောင်းကို ထပ်မံတွေ့ရှိထားပါတယ်။
ရုပ်အလောင်းထိန်းသိမ်းတဲ့ ရေခဲတိုက်တွေပြည့်လျှံနေတာကြောင့် နီပေါအစိုးရက DNA နမူနာတွေရယူပြီးနောက် ရုပ်အလောင်းတွေကို စုပေါင်းမြှုပ်နှံမှုတွေ စတင်ပြုလုပ်နေရပြီး ရေခဲသေတ္တာ ၁,၀၀၀ ထက်မနည်းကူညီပေးဖို့ နိုင်ငံတကာကိုအကူအညီတောင်းခံထားပါတယ်။
