Border News Agency
ထိုင်း၊ အောက်တိုဘာ ၅။
ထိုင်းနိုင်ငံ၊ချင်းရိုင်ခရိုင်ကနေ အမြန်ချောပို့ပါဆယ်ထုတ်တွေထဲထည့်ပြီး တောင်ပိုင်းနဲ့ အရှေ့ပိုင်းဒေသတွေကို စိတ်ကြွဆေးပြားတွေ ဖြန့်ဖြူးနေတဲ့ဂိုဏ်းကို ထိုင်းမူးယစ်ဆေးဝါးထိန်းချုပ်ရေးအဖွဲ့ (ONCB) က ဖမ်းဆီးရမိခဲ့ပါတယ်။
ဒီဖမ်းဆီးမှုအတွင်း တရားခံခုနှစ်ဦးနဲ့အတူ ပါဆယ်ဆယ့်တထုပ်ထဲ ဝှက်သိမ်းထားတဲ့စိတ်ကြွဆေးပြားဆယ့်ငါးသိန်းကိုးသောင်းခန့်ကို သိမ်းဆည်းရမိခဲ့တာဖြစ်ပါတယ်။
ပြီးခဲ့တဲ့ စက်တင်ဘာလ ၂၈ ရက်ကနေ အောက်တိုဘာ ၃ ရက်နေ့အထိ စုံစမ်းထောက်လှမ်းပြီးနောက် ပို့ဆောင်သူ အဓိကတရားခံ အပါအဝင် ပါဝင်ပတ်သက်သူခုနှစ်ဦးကို ကရဘီ၊ ခြုံဖုန်း၊ ဆူရတ်ဌာနီ၊ ဖတ်သလောင်း၊ ဆုန်ခလာ နဲ့ ပရာချင်ဘူရီ ခရိုင်တွေမှာ ဖမ်းဆီးရမိခဲ့တာပါ။
ဒီဂိုဏ်းဟာရေဘေးကင်းစင်တဲ့ လမ်းကြောင်းတွေနဲ့ ပုဂ္ဂလိက အမြန်ချောပို့လုပ်ငန်းတွေကို အခွင့်ကောင်းယူပြီး စစ်ဆေးရေးဂိတ်တွေကိုရှောင်ကွင်းကာ သယ်ယူပို့ဆောင်ခဲ့ကြတာဖြစ်ပါတယ်။
ခုလက်ရှိမှာတော့ ထိုင်းအာဏာပိုင်တွေက မူးယစ်ဆေးဝါးဥပဒေတွေနဲ့အညီ အမှုဖွင့်ထားပြီး နောက်ကွယ်က စေခိုင်းသူတွေကိုပါ ထပ်မံဖမ်းဆီးနိုင်ဖို့ ဆက်လက်စုံစမ်းစစ်ဆေးနေပါတယ်။
