Border News Agency
ပုဏ္ဏားကျွန်း၊ စက်တင်ဘာ ၂၇။
အာရက္ခဒေသမှာ ရာသီအကူးအပြောင်းကာလဖျားနာမှုတွေနဲ့ ရာသီတုပ်ကွေးဖြစ်ပွားသူတွေများလာနေတာကြောင့် ကျန်းမာရေးစောင့်ရှောက်မူလိုအပ်နေကြတယ်လို့ အာရက္ခပြည်သူတွေကဆိုကြပါတယ်။
ပုဏ္ဏားကျွန်း၊ကျောက်တော်၊မြောက်ဦးစတဲ့မြို့နယ်တွေမှာ ရာသီအကူးအပြောင်းတွေကြောင့် စက်တင်ဘာလဒုတိယအပတ်မှစပြီး ကျေးရွာတိုင်းလိုလိုမှာ ဖျားနာပြီးရာသီတုပ်ကွေးဖြစ်ပွားသူတွေများလာနေတယ်လို့ ဒေသခံတွေကဆိုကြပါတယ်။
“ရာသီကူးပြောင်းရင်ဖျားတာတွေကဖြစ်လေ့ဖြစ်ထရှိပေမယ့် ခုကတုပ်ကွေးလည်းဖြစ်နေကြတယ်။ ရွာတိုင်းမှာဖြစ်နေကြတယ်။ဖျားပြီးတုပ်ကွေးဖြစ်သူများနေတာ။ ဆေးခန်းတွေလည်းဖွင့်တာနည်းတော့ ကျန်းမာရေးစောင့်ရှောက်မူတွေလိုအပ်နေပါတယ်။” လို့ပုဏ္ဏားကျွန်းမြို့နယ်ရှိ အာရက္ခပြည်သူတဦးက Border News Agency ကို ပြောပါတယ်။
ဖျားနာပြီးရာသီတုပ်ကွေးဖြစ်ပွားသူတွေဟာ အသက်အရွယ်မရွေးကလေးငယ်တွေအပါအဝင်သက်ကြီးရွယ်အိုတွေအထိပါဖြစ်ပွားနေကြတာလို့လည်း ဆိုပါတယ်။
လမ်းပန်းဆက်သွယ်ရေးခက်ခဲ့တဲ့ ကျေးရွာတွေက ဒေသခံတွေမှာ ရာသီတုပ်ကွေးဖြစ်ပွားနေကြပေမယ့် ဆေးကုဖို့နဲ့လမ်းခရီးစရိတ်စတဲ့ ငွေကြေးအခက်အခဲတွေကြောင့် ရွာဆေးဆိုင်တွေကဆေးတကြိမ်စာကို ကျပ်ငါးထောင်ကျော်ပေးပြီး ဝယ်သောက်နေရပေမယ့် မသက်သာကြဘူးလို့လည်း ဒေသခံတွေကဆိုကြပါတယ်။
အဲဒါကြောင့် ဆေးခန်းတွေကိုသွားပြကြရပြီး တချို့ဆေးခန်းတွေမှာ ကျွမ်းကျင်ကျန်းမာရေးဝန်ထမ်းတွေနဲ့ ဆေးဝါးမရှိတာတွေကြောင့် အခက်အခဲနဲ့ကြုံနေရလို့ ကျန်းမာရေးစောင့်ရှောက်မှုလိုအပ်နေကြတယ်လို့ဆိုကြပါတယ်။
“ရာသီတုပ်ကွေးကကူးစက်တယ်။တအိမ်မှာတယောက်ဖြစ်ရင်ကျန်တဲ့သူတွေပါဖြစ်သွားတယ်။စိုးရိမ်ရတဲ့ရောဂါတခုပေါ့။ ဆေးဝါးရှားပါးတာနဲ့ဆေးခန်းတွေမဖွင့်တာကြောင့် အသက်အန္တရာယ်ဆုံးရှုံးတာတွေပါကြုံနိုင်တယ်။” လို့ပုဏ္ဏားကျွန်းမြို့နယ်ရှိ အမျိုးသမီးတဦးက Border News Agency ကိုပြောပါတယ်။
အာရက္ခပြည်သူတွေမှာ ဆေးရုံး၊ဆေးခန်းတွေသွားပြကြရတဲ့အခါမှာလည်း ဆေးကုသစာရိတ်အပြင် လမ်းခရီးစရိတ်တွေပါ ကုန်ကျမှုများပြားလို့ အခက်အခဲတွေနဲ့ကြုံနေကြရတယ်လို့ ဆိုကြပါတယ်။
ရာသီတုပ်ကွေးဟာ အိပ်ရေးပျက်တာ၊ အချိန်လွန်မှရေချိုးတာ၊ ပင်ပန်းညောင်းညာတာတွေကြောင့်လည်းဖြစ်ပွားတတ်ပြီး လူထူထပ်တဲ့နေရာတွေမှာချောင်းဆိုး၊ နှာချေတာကလည်းတဆင့် အသက်အရွယ်မရွေး အလွယ်တကူကူးစက်နိုင်တဲ့ရောဂါဖြစ်ပြီး အချိန်မီဆေးဝါးမကုသမှုမခံယူရင် အသက်အန္တရာယ်ပါဆုံရှုံးနိုင်တယ်လို့ ဆိုကြပါတယ်။
အာရက္ခဒေသမှာ အာရက္ခအဆုံးအဖြတ်စစ်ပွဲစတင်ခဲ့တဲ့ ၂၀၂၃ ခုနှစ်ကစလို့ စစ်ကော်မရှင်တပ်ဟာ ကုန်လမ်း၊ရေလမ်းတွေကို ကန့်သတ်ပိတ်ဆို့ထားတာကြောင့် ဆေးဝါးသယ်ယူဖို့ အခက်အခဲတွေရှိနေတယ်လို့ ဆိုကြပါတယ်။
အဲဒါကြောင့် ပြည်သူတွေဟာ ဆေးဝါးရှားပါးမှုတွေနဲ့ကြုံနေရပြီး စစ်ကော်မရှင်ကဆေးရုံ၊ဆေးခန်းတွေကို လေကြောင်းတိုက်ခိုက်တာတွေကြောင့်လည်း ဆေးရုံတွေကိုပုံမှန်မဖွင့်လှစ်နိုင်ဘဲ ပိတ်ထားရတယ်လို့ ပြည်သူတွေကဆိုကြပါတယ်။
အာရက္ခဒေသမှာ နွေအကုန်မိုးအကူးရာသီအပြောင်းလဲကြောင့် ပြီးခဲ့တဲ့မေလအစပိုင်းကလည်း ပုဏ္ဏားကျွန်၊ကျောက်တော်နဲ့ မြောက်ဦးစတဲ့မြို့နယ်တွေက ဒေသခံတွေမှာ ငှက်ဖျားနဲ့ ရာသီတုပ်ကွေဖြစ်ပွားသူတွေ မြင့်တက်ခဲ့ပါတယ်။
ပုဏ္ဏားကျွန်းမြို့နယ်၊ ဂဏန်းတောင်ကျေးရွာမှာလည်း ပြီးခဲ့တဲ့မေလတတိယအပတ်က ရာသီအကူးအပြောင်းအလဲကြောင့် ငှက်ဖျားဖြစ်ပွားပြီးဆယ်ကျော်သက်အရွယ်အမျိုးသမီးငယ်တဦး သေဆုံးသွားခဲ့ပါတယ်။
