Border News Agency
ခင်ဦး၊ ဒီဇင်ဘာ ၃။
စစ်ကိုင်းတိုင်း၊ ခင်ဦးမြို့နယ်၊ ပြည်သူ့ကာကွယ်ရေးအဖွဲ့ဟာ တိုက်ပွဲအတွင်းသိမ်းဆည်းရမိခဲ့တဲ့ လက်နက်တချို့ကို တိုက်နယ်ပကဖတွေနဲ့ UG ပကဖတွေဆီ ဂုဏ်ပြုပေးခဲ့ပါတယ်။
အဲဒီတော်လှန်ရေးရဲဘော်တွေအတွက် MA1သေနတ်ဆယ်လက်နဲ့ G3သေနတ်လေးလက်၊ စုစုပေါင်းသေနတ်ဆယ့်လေးလက်ကို ဒီဇင်ဘာလ ၂ ရက်နေ့ကဂုဏ်ပြုပေးခဲ့တယ်လို့ဆိုပါတယ်။
ခင်ဦးမြို့နယ်၊ မုံလှကျေးရွာအတွင်း လေးရက်ကြာယာယီတပ်အထိုင်ချပြီး ပျဥ်ထောင်ပျူရွာဘက်ထွက်လာတဲ့ စစ်ကော်မရှင်တပ်နဲ့ ပျူစောထီးအင်အားတရာ့ရှစ်ဆယ်ကို ပြီးခဲ့တဲ့နိုဝင်ဘာလ ၂၃ ရက်နေ့က ခင်ဦးမြို့နယ်ပကဖနဲ့ ဒေသအခြေစိုက်ပူးပေါင်းတပ်ဖွဲ့တွေက ပူးပေါင်းတိုက်ခိုက်ခဲ့တယ်လို့ဆိုပါတယ်။
အဲဒီတိုက်ပွဲအတွင်းမှာ စစ်ကော်မရှင်တပ်ဖွဲ့ဝင်အများအပြားသေဆုံးခဲ့ပြီး ငါးကြင်းမြှီးတလက်၊ MA-1ဆယ်လက်၊ MA-2 သုံးလက်၊ BA-100/60mmကွန်မန်ဒိုစိန်ပြောယင်းတလက်၊ MA-3သုံးလက်၊ MA-4တလက်၊ G-3လေးလက်၊ MAS Sniperတလက်၊ M1-ငါးလက်နဲ့ ဆက်စပ်ကျည်ခဲယမ်းအစုံအများအပြားကို သိမ်းဆည်းရမိခဲ့တယ်လို့ ဆိုပါတယ်။
အဲဒီဂုဏ်ပြုပွဲမှာ မြို့နယ်ပကဖတာဝန်ခံ၊ ပကဖဒုတာဝန်ခံ၊ အင်အားစုဖွဲ့လေ့ကျင့်ရေးတာဝန်ခံ၊ စစ်လက်နက်တာဝန်ခံ၊ ကူကယ်တာဝန်ခံ၊ ဆက်သွယ်ရေးတာဝန်ခံ၊ သတင်းတာဝန်ခံ၊ ပကဖဘဏ္ဍာရေး၊ ပကဖရုံးအဖွဲ့မှူးနဲ့ ပကဖတပ်စိပ်မှူးတို့ကပေးအပ်ခဲ့ပြီး တိုက်နယ် ၁၊၂၊ ၃၊ ၄၊ ၅ ပကဖခေါင်းဆောင်၊ ဒုခေါင်းဆောင်နဲ့အဖွဲ့တွေ၊ UG ပကဖခေါင်းဆောင်နဲ့အဖွဲ့တွေ၊ သက်ဆိုင်ရာပကဖရဲဘော်တွေက လက်ခံရယူခဲ့ကြတယ်လို့ဆိုပါတယ်။
