Border News Agency
မောင်တော၊ ဇန်နဝါရီ ၁၈။
အာရက္ခတပ်တော်(AA)ထိန်းချုပ်ထားတဲ့ မောင်တောခရိုင်မှာ ကုန်တင်ကားတွေကို အလှည့်ကျစနစ်ပြုလုပ်ပေးဖို့ ကုန်တင်ကားပိုင်ရှင်တွေ တောင်းဆိုနေကြပါတယ်။
အဲဒီမောင်တောခရိုင်ဟာ နယ်စပ်ဒေသဖြစ်တာမို့ ကုန်စည်စီးဆင်းမှုတွေ အတိုင်းအတာတခုထိရှိနေပြီး ကုန်တင်ကားတချို့သာ တင်ဆောင်နေကြရတယ်လို့ ကုန်တင်ကားပိုင်ရှင်တွေဆိုကြပါတယ်။
အဲဒါကြောင့် ကုန်တင်ကားအားလုံး အညီအမျှလုပ်ကိုင်တင်ဆောင်ခွင့်ရဖို့အတွက် အာရက္ခပြည်သူ့တော်လှန်ရေးအစိုးရဟာ ကုန်တင်ကားတွေကို အလှည့်ကျစနစ်ပြုလုပ်ပေးဖို့ ကုန်တင်ကားပိုင်ရှင်တွေ တောင်းဆိုနေကြပါတယ်။
“ကျွန်တော်တို့ဖြစ်စေချင်တာက ကားအသင်းဖွဲ့ပြီး နံပါတ်စဉ်အလိုက်ကုန်တင်ပြီး သွားလာခွင့်ပေးဖို့ပါ။ မြို့နယ်နဲ့ခရိုင်က ULAတာဝန်ရှိသူတွေကိုလည်း စာနဲ့တကွတင်ပြထားခဲ့တာသုံးကြိမ်ရှိပါပြီ။ ဘာမှအကြောင်းမထူးပါဘူး။ သူတို့နဲ့အလွမ်းသင့်တဲ့ကုန်ကားပိုင်ရှင်တွေပဲ ကုန်တင်သွားခွင်ရနေကြပါတယ်။ ကျန်ကားကြီးသမားတွေကားမထွက်ရလို့ ထမင်းတောင်ငတ်ကြပါတော့မယ်။ တရားမျှတမူရှိဖို့တော့လိုအပ်နေပါတယ်။”လို့ ဘူးသီးတောင်မြို့နယ်မှ ကုန်တင်ကားပိုင်ရှင်တဦးက Border News Agency ကို ပြောပါတယ်။
အဲဒီမောင်တောခရိုင်မှတဆင့် ဘင်္ဂလားဒေ့ရှ်နိုင်ငံနဲ့ နယ်စပ်ကုန်သွယ်ရေးပြုလုပ်နေတာတွေရှိနေပြီး ကုန်စည်စီးဆင်းမှုတွေနေ့စဥ်လိုလိုရှိနေတယ်လို့ ကုန်တင်ကားပိုင်ရှင်တွေ ဆိုကြပါတယ်။
အဲဒီကုန်စည်စီဆင်းနေမှုတွေဟာ အနည်းငယ်သာဖြစ်တာမို့ ပုံမှန်ကုန်တင်ခွင့်ရနေကြတဲ့ ကုန်တင်ကားတွေသာနေ့စဥ်ပုံမှန်ကုန်တင်ခွင့်ရနေကြတာလို့ ကုန်တင်ကားပိုင်ရှင်တွေက ဆိုကြပါတယ်။
“အဓိကကျွန်တော်တို့ ကားသမားတွေတောင်းဆိုချင်တာက ကားတွေကို နံပါတ်စဉ်အတိုင်းမဲနှိက်ပြီး နွားတွေတင်ပို့ခွင့်ရချင်ပါတယ်။ ခုအချိန်မှာလူတိုင်းအလုပ်လက်မဲ့ဖြစ်နေကြတာပါ။ တာဝန် ရှိလူကြီးတွေလည်းနားလည်ပေးဖို့လိုပါတယ်။”လို့ မောင်တောမြို့မှကုန်တင်ကားပိုင်ရှင်တဦးက Border News Agency ကိုပြောပါတယ်။
အဲဒီအာရက္ခ-ဘင်္ဂလားနယ်စပ်၊ မောင်တောခရိုင်ကို အာရက္ခတပ်တော်ထိန်းချုပ်ထားပြီး အာရက္ခကုန်သည်ကြီးများအသင်းက နယ်စပ်ကုန်သွယ်ရေးကိုဦးဆောင်လုပ်နေတယ်လို့ မောင်တောခရိုင်နေပြည်သူတွေက ဆိုကြပါတယ်။
အဲဒီနယ်စပ်ကုန်သွယ်ရေးဟာ ဘင်္ဂလားဒေ့ရှ်နိုင်ငံနဲ့ နားလည်းမှုအရလုပ်နေကြတာဖြစ်ပြီး လာမယ့်ဘင်္ဂလားဒေ့ရှ်နိုင်ငံရွေးကောက်ပွဲအပြီး အစိုးရသစ်တက်လာမှသာတရားဝင်ဖြစ်လာနိုင်မယ်လို့ ကုန်သည်ကြီးတွေက ဆိုကြပါတယ်။
