Border News Agency
ဘန်ကောက်၊ ဇန်နဝါရီ ၂၆။
ထိုင်းနိုင်ငံ၊ သုဝဏ္ဏဘူမိလေဆိပ်မှာ အိန္ဒိယကလာရောက်တဲ့ခရီးသည်တွေကို နိပါဗိုင်းရပ်စ် (Nipah Virus) ကြိုတင်ကာကွယ်တဲ့အနေနဲ့ အသေးစိတ်စစ်ဆေးမှုတွေ လုပ်ဆောင်နေတယ်လို့ ထိုင်းသတင်းတွေမှာ ဖော်ပြထားပါတယ်။
ကာလကတ္တားမြို့ကနေ ဇန်နဝါရီလ၂၅ ရက်နေ့ကဆိုက်ရောက်လာတဲ့ ခရီးစဉ်အမှတ် 6E1911 နဲ့ TG314 က ခရီးသည် သုံးရာ့သုံးဆယ်ကျော်ကိုစစ်ဆေးခဲ့ရာမှ ရောဂါသံသယရှိသူ တဦးမှမတွေ့သေးဘူးလို့ ဆိုပါတယ်။
ဒါပေမယ့် ကိုယ်ပူခြင်း၊ ခေါင်းကိုက်ခြင်းနဲ့ အသက်ရှူလမ်းကြောင်းဆိုင်ရာ ပြဿနာရှိသူတွေ တွေ့ရင် ကျန်းမာရေးဌာန ဖုန်း ၀၂ – ၁၃၂၀၁၃၉ ကို ဆက်သွယ်ဖို့အကြောင်းကြားထားပါတယ်။
အဲဒီနိပါဗိုင်းရပ်စ်ဟာ ၁၉၉၈ ခုနှစ်က မလေးရှားနိုင်ငံ၊ ဆွန်ဂိုင်းနိပါကျေးရွာက ဝက်မွေးမြူရေးခြံ အလုပ်သမားတွေဆီမှာ စတင်တွေ့ရှိခဲ့တာပါ။
အဓိကအားဖြင့် လင်းနို့ကိုက်ထားတဲ့ အသီးအနှံတွေ၊ ရောဂါရှိတဲ့ဝက်တွေနဲ့ တိုက်ရိုက်ထိတွေ့ရာကနေ ကူးစက်တတ်သလို လူအချင်းချင်းလည်း ကူးစက်နိုင်ပါတယ်။
ဒီဗိုင်းရပ်စ်ဟာ ကူးစက်ခံရရင် လေးဆယ်ရာခိုင်နှုန်းကနေ ခုနှစ်ဆယ့်ငါးရာခိုင်နှုန်းအထိ သေဆုံးနိုင်ခြေရှိပြီး လက်ရှိအချိန်ထိ တရားဝင်ကာကွယ်ဆေး မရှိသေးပါဘူး။
အိန္ဒိယနိုင်ငံမှာ ၂၀၂၆ ဇန်နဝါရီလအတွင်း ကူးစက်မှုအသစ်တွေ ပြန်တွေ့နေရတာကြောင့် ထိုင်းနိုင်ငံက အခုလိုလေဆိပ်တွေမှာ တင်းတင်းကျပ်ကျပ်စစ်ဆေးနေတာ ဖြစ်ပါတယ်။
