Border News Agency
မကွေး၊ ဇန်နဝါရီ ၃၀။
မကွေးတိုင်း၊ စလင်းမြို့နယ်တောင်ပေါ်ဒေသကကျေးရွာနှစ်ရွာမှာ သောက်သုံးရေရှားပါးပြီး ရေမသန့်တာကြောင့် ရွာလုံးကျွတ်နီးပါးအရေပြားရောဂါ ဖြစ်ပွားနေတယ်လို့ ပြည်သူ့ညီနောင် စလင်းမှသိရပါတယ်။
အဲဒီလို အရေပြားရောဂါတွေဟာကလေး၊ လူကြီးမရွေး တကိုယ်လုံးယားနာဖုတွေနဲ့ ပွေးကွက်တွေဖြစ်နေပြီး အိပ်မရ၊ စားမရဖြစ်တဲ့အထိ ဝေဒနာပြင်းထန်နေကြတယ်လို့ ဆိုကြပါတယ်။
အဲဒီရောဂါဟာ အစပိုင်းမှာ လူနည်းစုသာ ဖြစ်ပွားခဲ့ပေမယ့် နောက်ပိုင်းမှာတော့ တရွာလုံးကို ကူးစက်သွားခဲ့တာလို့ဆိုကြပါတယ်။
အဲဒါကြောင့် ဒေသခံတွေဟာ နွားမတောင်က စိမ့်စမ်းရေကိုပဲ အဓိကအားကိုးနေရပြီး ချိုးရေ၊ သုံးရေ မသန့်ရှင်းတာကြောင့်အခုလို ဘေးဒုက္ခကြုံနေရတာ ဖြစ်တယ်လို့ ဆိုကြပါတယ်။
”ကျွန်မတို့ရွာမှာ ရေရှားတော့ စိမ့်စမ်းရေကိုပဲ သုံးရတာ။ ရေချိုးတာကလည်း ဒီအတိုင်းပဲချိုးတာဆိုတော့ ရေမသန့်တာကြောင့်ဖြစ်မယ်ထင်တယ်။ မျက်နှာ၊ လက်၊ခြေထောက်တင်မကဘူး၊ တကိုယ်လုံး အနီဖုတွေ၊ ပွေးကွက်တွေနဲ့ ယားလွန်းလို့ နေ့ရောညပါ အိပ်မရတော့ဘူး။ အစက ၄၊ ၅ ယောက်ပဲ၊ အခုတော့ တရွာလုံး ဖြစ်နေတာ။” လို့ ရွာခံအမျိုးသမီးတဦးက ဆိုပါတယ်။
အဲဒီကျေးရွာတွေဆီကို စလင်းမြို့က လူမှုကူညီရေးအဖွဲ့တချို့ သွားရောက်ပြီး ဆေးဝါးနဲ့ အသိပညာပေးမှုတွေ လုပ်ဆောင်ခဲ့ပေမယ့် ရောဂါကသက်သာရုံပဲရှိပြီး အမြစ်မပြတ်သေးဘူးလို့ ဆိုကြပါတယ်။
အဲဒီ ကျေးရွာတွေမှာ ကျေးလက်ဆေးခန်းရှိပေမယ့်လည်း လက်ရှိဖြစ်ပွားနေတဲ့ အခြေအနေဟာ ကျေးလက်ကျန်းမာရေးဝန်
ထမ်းတွေနဲ့တင်မလုံလောက်တော့တဲ့ အနေအထား ဖြစ်နေတယ်လို့ ဆိုကြပါတယ်။
အဲဒီကူညီပေးနေတဲ့အဖွဲ့တွေဟာ အထူးကုဆရာဝန်ကြီးတွေကို အကူအညီတောင်းထားပေမယ့် ဆေးဝါးဝယ်ယူဖို့နဲ့ တခြားကုန်ကျစရိတ်တွေအတွက် ငွေကြေးအခက်အခဲ ကြုံနေကြရတယ်လို့ ဆိုကြပါတယ်။
”ကျွန်မတို့လည်းဆေးသွားလှူတာနှစ်ကြိမ်ရှိပြီ။ ဒါပေမယ့် ဖြစ်နေတာကတရွာလုံးနီးပါးဆိုတော့အများကြီးမထောက်ပံ့နိုင်ဘူး။အခုတော့ အထူးကုဆရာဝန်ကြီးတွေကိုအကူအညီတောင်းထားတယ်။ ဆရာဝန်တွေကလိုက်ကုပေးမယ်ပြောပါတယ်။ အဓိကကတော့ဆေးဝါးဝယ်ဖို့ ငွေကြေးလိုအပ်နေတာပါ။”လို့ ကူညီပေးနေတဲ့အဖွဲ့က တာဝန်ရှိသူတဦးက ပြောပါတယ်။
အဲဒီရောဂါတွေဟာ အခုဆိုရင်တနေ့ထက်တနေ့ ပိုဆိုးလာပြီး တချို့ဆိုပိုးဝင်ကာ ဖျားနာတဲ့အထိ စိုးရိမ်ရတဲ့အခြေအနေရှိနေတယ်လို့ဆိုကြပါတယ်။
အဲဒါကြောင့် စလင်းတောင်ပေါ်က ဒုက္ခရောက်နေတဲ့ ပြည်သူတွေအတွက် အလှူရှင်တွေနဲ့ ဆေးဝါးအကူအညီတွေ အရေးပေါ် လိုအပ်နေတယ်လို့ ရွာသားတွေနဲ့ ကူညီပေးနေသူတွေကဆိုကြပါတယ်။
