Border News Agency
မန္တလေး၊ ဇန်နဝါရီ ၃၀။
အမျိုးသားညီညွတ်ရေးအစိုးရ (NUG) စိုးမိုးထားတဲ့နယ်မြေအတွင်း ဖြတ်သန်းလာတဲ့ကားတွေပေါ်ကနေ ဖမ်းဆီးရမိထားတဲ့မူးယစ်ဆေးဝါးတွေကို ဇန်နဝါရီလ၂၅ ရက်နေ့က အုပ်ချုပ်ရေးနယ်မြေတနေရာမှာ မီးရှို့ဖျက်ဆီးခဲ့တယ်လို့ ထုတ်ပြန်ပါတယ်။
အဲဒီအခမ်းအနားကို NUG ပြည်ထောင်စုဝန်ကြီးချုပ်ရုံးဝန်ကြီး ဒေါက်တာဇော်ဝေစိုးနဲ့ ကာကွယ်ရေးဝန်ကြီး ဦးရည်မွန်တို့ ကိုယ်တိုင်တက်ရောက်ခဲ့ကြပြီး ဒေသခံပြည်သူတွေ၊ PDF တပ်ရင်းတွေနဲ့ ပအဖ၊ ပကဖ၊ ပလဖ အဖွဲ့တွေလည်း စုံစုံလင်လင်တက်ရောက်ခဲ့ကြတယ်လို့ ဆိုပါတယ်။
အဲဒီ မီးရှို့ဖျက်ဆီးလိုက်တဲ့ မူးယစ်ဆေးဝါးတွေထဲမှာ ဘိန်းဖြူ ၆,၅၄၅ ခွက်နဲ့ WY စိတ်ကြွဆေးပြား ၄၆ သိန်းကျော်ပါဝင်ပြီး ကာလတန်ဖိုးအရ ကျပ်သိန်းပေါင်းတသိန်းခန့်အထိ ရှိတယ်လို့ ဆိုပါတယ်။
အဲဒီဘိန်းဖြူတွေကို မြန်မာနိုင်ငံကျောင်းသားများဒီမိုကရက်တစ်တပ်ဦး (ABSDF) က ဖမ်းဆီးရမိပြီး NUG ထံ လွှဲပြောင်းပေးခဲ့တာဖြစ်ပြီး စိတ်ကြွဆေးပြားတွေကိုတော့ PDF တပ်ရင်းတပ်ဖွဲ့တွေက ဖမ်းဆီးရမိခဲ့တာလို့ ဆိုပါတယ်။
အဲဒါကြောင့် NUG အစိုးရအနေနဲ့ သူတို့ထိန်းချုပ်နယ်မြေတွေအတွင်း မူးယစ်ဆေးဝါးကင်းစင်ရေးအတွက် အခုလိုစစ်ဆေးဖမ်းဆီးမှုတွေကို တင်းတင်းကျပ်ကျပ် လုပ်ဆောင်နေတာလို့ ဆိုပါတယ်။
အဲဒီ မူးယစ်ဆေးဝါးသယ်ဆောင်လာတဲ့ တရားခံတွေကိုဖမ်းဆီးထားပြီး ဥပဒေနဲ့အညီ ထိထိရောက်ရောက် အရေးယူဆောင်ရွက်သွားမယ်လို့ ဆိုပါတယ်။
