Border News Agency
ချင်းမိုင်၊ဩဂုတ် ၂၅။
ထိုင်း-မြန်မာနယ်စပ်၊ ချင်းမိုင်ခရိုင်၊ မဲအိုင်မြို့နယ်အတွင်းမှာ မူးယစ်ဆေးဝါးတရားမဝင်သယ်ဆောင်လာသူတွေနဲ့ ထိုင်းစစ်တပ်တို့ ပစ်ခတ်မှုဖြစ်ပွားခဲ့ပြီး စိတ်ကြွဆေးပြားခြောက်သိန်းနဲ့အတူ လူနှစ်ဦးအလောင်းတွေ့ရှိခဲ့တယ်လို့ ဖာမိူင်းစစ်ကြောင်းက သြဂုတ်လ ၂၅ရက်၊ ဒီနေ့ထုတ်ပြန်ပါတယ်။
အဲဒီမဲအိုင်မြို့နယ်၊ နာမအင်းကျေးရွာအနီး သြဂုတ်လ ၂၃ ရက်၊ညပိုင်းက သဘာဝနယ်စပ်လမ်းကြောင်းအတိုင်းလာနေတဲ့ မသင်္ကာသူသုံးဦးမှငါးဦးခန့်ကို ထိုင်းစစ်ကြောင်းက စစ်ဆေးဖို့ တားမြစ်ချိန် တဖက်မှ စတင်ပစ်ခတ်ခဲ့တာကြောင့်ငါး မိနစ်ခန့် ပစ်ခတ်မှု ဖြစ်ပွားခဲ့တာပါ။
ညပိုင်းဖြစ်တဲ့အတွက် တပ်ဖွဲ့ဝင်တွေကနေရာကို ထိန်းချုပ်ထားပြီး ဩဂုတ်လ ၂၄ ရက်၊မ နက်ပိုင်းမှာ ဒရုန်းတွေနဲ့စစ်ကူတပ်ဖွဲ့တွေပါဝင်ကာ အခင်းဖြစ်နေရာကို ရှင်းလင်းစစ်ဆေးခဲ့တာဖြစ်ပါတယ်။
အဲဒီစစ်ဆေးမှုအတွင်း မူးယစ်မှောင်ခိုအဖွဲ့မှနှစ်ဦးသေဆုံးနေပြီး သူတို့ဆီမှကျောပိုးအိတ်အဖြစ်ပြုပြင်ထားတဲ့ ဂုံနီအိတ်လေးအိတ်အတွင်းမှ ယာဘစိတ်ကြွဆေးပြား စုစုပေါင်းခြောက်သိန်းခန့်၊ သေနတ်နှစ်လက်နဲ့ ကျည်ခွံတွေကို သိမ်းဆည်းရမိခဲ့ပါတယ်။
အဲဒီသိမ်းဆည်းရမိတဲ့ မူးယစ်ဆေးဝါးတွေနဲ့လက်နက်တွေကို မဲအိုင်ရဲစခန်းသို့လွှဲပြောင်းပေးထားပြီး ပါဝင်ပတ်သက်တဲ့ကွန်ရက်တွေကို ဆက်လက်စုံစမ်းဖော်ထုတ်နေတယ်လို့ဆိုပါတယ်။
