Border News Agency
ဥရောပ၊ ဖေဖော်ဝါရီ ၁။
စစ်ကော်မရှင်က ၂၀၂၅ ခုနှစ် ဒီဇင်ဘာလနဲ့ ၂၀၂၆ ခုနှစ် ဇန်နဝါရီလအတွင်း ကျင်းပခဲ့တဲ့ရွေးကောက်ပွဲလုပ်ငန်းစဉ်တွေကို ဥရောပသမဂ္ဂ (EU) က အနီးကပ်စောင့်ကြည့်ခဲ့တယ်လို့ ဆိုပါတယ်။
ဒါပေမဲ့ ဒီရွေးကောက်ပွဲဟာလွတ်လပ်ပြီး တရားမျှတတဲ့အခြေခံစံနှုန်းတွေနဲ့ လုံးဝကိုက်ညီမှုမရှိတာကို တွေ့ရတယ်လို့ ဥရောပသမဂ္ဂက ထုတ်ပြန်လိုက်ပါတယ်။
အဲဒီရွေးကောက်ပွဲ လုပ်ငန်းစဉ်ကို လက်ရှိဖြစ်ပေါ်နေတဲ့ အခြေအနေတွေနဲ့အကောင်အထည်ဖော်တဲ့ပုံစံတွေအရ အပြည်ပြည်ဆိုင်ရာစံချိန်စံညွှန်းတွေနဲ့ မကိုက်ညီတာက အလွန်ထင်ရှားနေတယ်လို့ဆိုပါတယ်။
အဲဒီထဲအထူးသဖြင့်ယုံကြည်စိတ်ချရမှု မရှိတာ၊ ပွင့်လင်းမြင်သာမှုမရှိတာနဲ့ အားလုံးပါဝင်ပတ်သက်ခွင့်မရှိခြင်းတွေကြောင့် ဒါဟာတရားဝင်တဲ့ရွေးကောက်ပွဲ မဟုတ်ဘူးလို့ EU က ဆိုပါတယ်။
နိုင်ငံအတွင်းမှာ အခြေခံလွတ်လပ်ခွင့်တွေကို ကျယ်ကျယ်ပြန့်ပြန့် ကန့်သတ်ချုပ်ချယ်ထားပြီး ကြောက်ရွံ့မှုတွေ ကြီးစိုးနေတဲ့ ပတ်ဝန်းကျင်မှာ ဒီရွေးကောက်ပွဲကို ပြုလုပ်ခဲ့တာ ဖြစ်တယ်လို့ဆိုပါတယ်။
အဲဒီလို အခြေအနေမျိုးမှာ ကျင်းပတဲ့ရွေးကောက်ပွဲဟာ ပြည်သူ့ဆန္ဒအစစ်အမှန်ကို ကိုယ်စားမပြုနိုင်ဘူးလို့ ဥရောပသမဂ္ဂက ထောက်ပြထားပါတယ်။
ဒါ့အပြင် ရွေးကောက်ပွဲကိုနှောင့်ယှက်ဟန့်တားတယ်ဆိုတဲ့ အကြောင်းပြချက်နဲ့ ပြည်သူတွေကိုဖမ်းဆီးထိန်းသိမ်းထားတာတွေကိုလည်း EU က ပြင်းပြင်းထန်ထန် ရှုတ်ချလိုက်ပါတယ်။
အဲဒီထဲအကြောင်းမဲ့ ဖမ်းဆီးခံထားရသူ အားလုံးကိုချက်ချင်းလွှတ်ပေးဖို့နဲ့ အကြမ်းဖက်မှုအမျိုးအစားအားလုံးကို ရပ်တန့်ဖို့လည်း တိုက်တွန်းထားပါတယ်။
ရွေးကောက်ပွဲ လုပ်ငန်းစဉ်တွေဟာ ပါဝင်ပတ်သက်သင့်သူ အားလုံးပါဝင်တဲ့ နိုင်ငံရေးလုပ်ငန်းစဉ်ဖြစ်မလာဘဲ စစ်ကော်မရှင်က တဖက်သတ်လုပ်ဆောင်ခဲ့တာဖြစ်တယ်လို့ဆိုပါတယ်။
အဲဒါကြောင့် ဒီရွေးကောက်ပွဲဟာ မြန်မာနိုင်ငံရဲ့ ပဋိပက္ခတွေကိုဖြေရှင်းနိုင်မယ့် နည်းလမ်းမဟုတ်ဘူးလို့ ဥရောပသမဂ္ဂက သတ်မှတ်လိုက်ပါတယ်။
ဥရောပသမဂ္ဂဟာ ဒီမိုကရေစီကို လိုလားတဲ့မြန်မာပြည်သူတွေနဲ့အတူ ရပ်တည်နေမှာဖြစ်သလို အခုလိုတရားမဝင်တဲ့ ရွေးကောက်ပွဲ လုပ်ငန်းစဉ်တွေအစား လူ့အခွင့်အရေးကိုလေးစားပြီး အားလုံးပါဝင်နိုင်တဲ့ တကယ့်နိုင်ငံရေးလမ်းကြောင်းပေါ်ကို လျှောက်လှမ်းဖို့လိုအပ်နေပြီလို့ ဆိုပါတယ်။
