Border News Agency
နေပြည်တော်၊ ဇွန် ၁၉။
နိုင်ငံတကာအနေနဲ့ ရင်းနှီးမြှုပ်နှံမှုအသစ်တွေ၊ စီးပွားရေးဆိုင်ရာသဘောတူညီရင် ဥပဒေနဲ့ဘဏ္ဍာရေးအန္တရာယ်ရှိနိုင်တယ်လို့ အမျိုးသားညီညွတ်ရေးအစိုးရ (NUG)၊ နိုင်ငံခြားရေးဝန်ကြီးဌာနကဇွန်လ ၁၉ ရက်၊ ဒီနေ့ထုတ်ပြန်ပါတယ်။
အမျိုးသားညီညွတ်ရေးအစိုးရဟာ မြန်မာနိုင်ငံရဲ့အချုပ်အခြာအာဏာ၊ ဒေသတွင်းတည်ငြိမ်ရေးနဲ့ အပြန်အလှန်လေးစားမှုကို အခြေခံတဲ့ဆက်ဆံရေးကို အလေးထားတယ်လို့ ဆိုပါတယ်။
အတုအယောင်ရွေးကောက်ပွဲကိုအခြေခံပြီး တရားဝင်မှုရဖို့ကြိုးစားနေတဲ့ အာဏာသိမ်းစစ်တပ်ကို အလေးပေးဆက်ဆံတာဟာ နိုင်ငံရေးပြဿနာကို မဖြေရှင်းနိုင်တဲ့အပြင် စစ်အုပ်စုရဲ့ အကြမ်းဖက်မှုတွေကိုပိုဆိုးစေဖို့ အားပေးသလိုဖြစ်စေတယ်လို့ ထောက်ပြထားပါတယ်။
အဲဒီအပြင် ကုလသမဂ္ဂပဋိညာဉ်စာတမ်းပါ ပြည်သူတွေရဲ့ ကိုယ်ပိုင်ပြဋ္ဌာန်းခွင့်၊ ပြည်တွင်းရေးမှာ ဝင်ရောက်မစွက်ဖက်ရေးစတာတွေကို လေးစားဖို့လိုအပ်သလို နိုင်ငံတကာ ရင်းနှီးမြှုပ်နှံမှုတွေအနေနဲ့လည်း ပွင့်လင်းမြင်သာမှုရှိပြီး ဒေသခံပြည်သူတွေရဲ့ အကျိုးစီးပွားကို ငဲ့ညှာဖို့လိုတယ်လို့ဆိုပါတယ်။
ခုလက်ရှိအခြေအနေမှာ အာဏာသိမ်းစစ်တပ်နဲ့ ချုပ်ဆိုတဲ့စီးပွားရေးသဘောတူညီချက်တွေဟာ ပြည်သူ့ကိုယ်စားပြုမှုမရှိသလို ဥပဒေရေးရာနဲ့ဘဏ္ဍာရေးဆိုင်ရာအန္တရာယ်တွေ ရှိလာနိုင်တယ်လို့သတိပေးထားပါတယ်။
အမျိုးသားညီညွတ်ရေးအစိုးရဟာ အိမ်နီးချင်းနိုင်ငံတွေအပါအဝင် နိုင်ငံတကာမိတ်ဖက်အားလုံးနဲ့အတူ နယ်စပ်ဒေသတည်ငြိမ်ရေး၊ နိုင်ငံဖြတ်ကျော် ရာဇဝတ်မှု နှိမ်နင်းရေးတို့အတွက် ပူးပေါင်းဆောင်ရွက်ဖို့အသင့်ရှိပြီး ဒေသတွင်းငြိမ်းချမ်းရေးနဲ့ ရေရှည်တည်ငြိမ်ရေးကို အထောက်အကူပြုမယ့်ဆက်ဆံရေးတွေကို တည်ဆောက်မြှင့်တင်သွားမယ်လို့ ဆိုပါတယ်။
