Border News Agency
မြောက်ဦး၊ ဩဂုတ် ၂၆။
အာရက္ခတပ်တော်(AA)ထိန်းချုပ်နယ်မြေတွေမှာ ပြည်သူတွေရဲ့ကျန်းမာရေးထိခိုက်ခံစားရမှုဆိုးကျိုးတွေကို လျှော့ချနိုင်ဖို့ရည်ရွယ်ပြီး ဆေးလိပ်နဲ့အရက်၊ ဘီယာကုန်ပစ္စည်းတွေအပေါ် တန်ဖိုးရဲ့ ငါးဆယ်ရာခိုင်နှုန်းထိ အခွန်တိုးမြှင့်ကောက်ခံနေတယ်လို့ ရက္ခိုင်အမျိုးသားအဖွဲ့ချုပ် (ULA) ဗဟိုအခွန်ဌာနကဆိုပါတယ်။
အဲဒီဆေးလိပ်နဲ့ ယမကာတွေအပေါ် အခွန်တိုးမြှင့်ကောက်ခံမှုကို ၂၀၂၀ ခုနှစ်ဝန်းကျင်ကတည်းက စတင်အကောင်အထည်ဖော်ခဲ့တာလို့ဆိုပါတယ်။
အခွန်ဌာနဟာ ပြည်သူကိုဗဟိုပြုပြီး အခွန်ကောက်ခံရာမှာ အများပြည်သူအတွက် ဝန်ထုပ်ဝန်ပိုးမဖြစ်စေရေးကို အဓိကဦးစားပေးစဉ်းစားနေတာဖြစ်ပြီး ကုန်စည်အမျိုးအစားအလိုက် အခွန်နှုန်းထားတွေကို ကာလဒေသအခြေအနေပေါ် မူတည်ပြီး အလျော့အတင်း ညှိနှိုင်းကောက်ခံနေတာလို့ဆိုပါတယ်။
အဲဒါကြောင့် အခြေခံစားသောက်ကုန်တွေကို အခွန်ကင်းလွတ်ခွင့် သို့မဟုတ် အနိမ့်ဆုံး နှုန်းထားတွေနဲ့သာကောက်ခံပြီး ပြည်သူ့ကျန်းမာရေးကိုထိခိုက်စေနိုင်တဲ့ ကုန်ပစ္စည်းတွေကိုတော့ အခွန်တိုးမြှင့်ကောက်ခံတာလို့လည်းဆိုပါတယ်။
အဲဒီကောက်ခံရရှိတဲ့ အခွန်ဘဏ္ဍာငွေတွေကိုကာကွယ်ရေး၊ လုံခြုံရေး၊ ပညာရေး၊ ကျန်းမာရေး၊ လမ်းတံတားတည်ဆောက်ရေးနဲ့ စစ်ဘေးရှောင်ပြည်သူတွေကို ထောက်ပံ့ပေးတဲ့ ပြည်သူ့အကျိုးပြုလုပ်ငန်းတွေမှာ စနစ်တကျပြန်လည်သုံးစွဲနေတယ်လို့လည်း ဆိုပါတယ်။
အာရက္ခအဆုံးအဖြတ်စစ်ပွဲမှာ အာရက္ခတပ်တော်(AA)ဟာ ပလက်ဝဒေသအပါအဝင် တဆယ့်ငါးမြို့နယ်ကို တိုက်ခိုက်သိမ်းပိုက်ထိန်းချုပ်ထားပြီးနောက် အာရက္ခပြည်သူ့တော်လှန်ရေးအစိုးရအဖြစ်အုပ်ချုပ်ရေးယန္တရားတွေဖော်ဆောင်နေပါတယ်။
အဲဒီအာရက္ခတပ်တော်ထိန်းချုပ်နယ်မြေတွေမှာ အာရက္ခပြည်သူ့တော်လှန်ရေးအစိုးရရဲ့အကောက်ခွန်နဲ့အခွန်ဌာနကဦးဆောင်ပြီး အခွန်၊အခတွေကောက်ခံနေတာဖြစ်ပါတယ်။
ဒါပေမယ့်အကောက်ခွန်နဲ့အခွန်ဌာနရဲ့ တရားဝင်ပြောဆိုချက်တွေနဲ့ကွဲလွှဲပြီး မြေပြင်မှာပိုမိုကောက်ခံမှုတွေရှိနေတယ်လို့ အာရက္ခပြည်သူတွေ ဝေဖန်ပြောဆိုနေကြပါတယ်။
