Border News Agency
မီဇိုရမ်၊ မတ် ၁၂။
မီဇိုရမ်ပြည်နယ်၊ လောင်တလိုင်မြို့မှာ ရခိုင်ကုန်သည်တဦး မေ့ကျန်ခဲ့တဲ့ ရူပီး ၁၅ သိန်း (မြန်မာကျပ်ငွေ သိန်း ၇၅၀ ခန့်)ကို ပိုင်ရှင်ထံရိုးရိုးသားသား ပြန်လည်အပ်နှံခဲ့တဲ့ သုံးဘီးဆရာကိုပြည်နယ်ဝန်ကြီးချုပ်ကိုယ်တိုင်ဂုဏ်ပြုဆု ချီးမြှင့်မယ်လို့ Zalen သတင်းမှာ ဖော်ပြထားပါတယ်။
အဲဒီလို ဂုဏ်ပြုခံရမယ့်သူဟာ လောင်တလိုင်မြို့၊အမှတ် ၃ ရပ်ကွက်မှာ နေထိုင်ပြီး သုံးဘီးကယ်ရီဆွဲကာ မိသားစုကို လုပ်ကျွေးနေတဲ့ ပူးဟင်နရီ (Pu Henry Lalhmingmuana)ဖြစ်ပါတယ်။
သူဟာ ပြီးခဲ့တဲ့ ၂၀၂၅ ခုနှစ်၊ဇွန်လအတွင်းက သူ့ရဲ့သုံးဘီးပေါ်မှာ ရခိုင်ကုန်သည်တဦး မေ့ကျန်ခဲ့တဲ့အိတ်အမည်းရောင်ထဲက ငွေသားတွေကိုကိုယ်တိုင်လိုက်လံ ရှာဖွေပြီး ပြန်လည်အပ်နှံခဲ့တာပါ။
လာမယ့် မတ်လ ၁၃ ရက်နေ့မှာ ကျင်းပမယ့် Chapchar Kut ပွဲတော်မှာ ပူးဟင်နရီကို ပြည်နယ်အတွင်း အရိုးသားဆုံးနဲ့ အဖြောင့်မတ်ဆုံးပုဂ္ဂိုလ်အဖြစ် ရွေးချယ်မှာဖြစ်ပါတယ်။
အဲဒီအပြင်ဝန်ကြီးချုပ်ရဲ့ဂုဏ်ပြုမှတ်တမ်း၊ဖလားအပြင်ဆုငွေအဖြစ် ရူပီး ၁ သိန်း (မြန်မာကျပ်ငွေ သိန်း ၅၀ ခန့်)ကိုပါ ချီးမြှင့်သွားမှာ ဖြစ်ပါတယ်။
ရခိုင်ကုန်သည်ဟာ သုံးဘီးပေါ်မှာ ငွေတွေမေ့ကျန်ခဲ့ပြီးနောက် သုံးဘီးသမားကိုလည်း မမှတ်မိတော့တာကြောင့် သောကရောက်နေချိန်မှာ ပူးဟင်နရီကတည်းခိုခန်းအထိ ကိုယ်တိုင်ပြန်လာပြီး ငွေတွေကို အပ်နှံခဲ့တာဖြစ်လို့ ဒေသတွင်းမှာ ချီးကျူးမှုတွေ ရရှိနေတာလည်း ဖြစ်ပါတယ်။
