Border News Agency
တေဟီရန်၊ မတ် ၁၃။
အီရန်နိုင်ငံ၊ တေဟီရန်မြို့တော်ရှိ မီရာဘတ်အပြည်ပြည်ဆိုင်ရာလေဆိပ်အတွင်း ရပ်နားထားတဲ့အီရန်လေတပ်ရဲ့ Boeing KC-747 လေကြောင်းဆီဖြည့်လေယာဉ်ကြီးဟာ မတ်လ ၁၂ ရက်၊ ညပိုင်းမှာ အမေရိကန်နဲ့အစ္စရေးတို့ရဲ့ လေကြောင်းတိုက်ခိုက်မှုကိုခံခဲ့ရတယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီလေယာဉ်ကြီးဟာ အီရန်လေတပ်အတွက်အလွန်အရေးပါတဲ့ ဗျူဟာမြောက်လေကြောင်းဆီဖြည့်လေယာဉ်ဖြစ်ပြီး လေဆိပ်အတွင်းမှာပဲပစ်မှတ်ထား တိုက်ခိုက်ခံခဲ့ရတာပါ။
ဒီတိုက်ခိုက်မှုကြောင့် လေယာဉ်ကြီးပျက်စီးသွားရုံသာမက အီရန်ရဲ့လေကြောင်းတိုက်လေယာဉ်တွေကို ဆီဖြည့်ပေးနိုင်စွမ်းကိုလည်းအကြီးအကျယ် ထိခိုက်သွားစေမှာဖြစ်ပါတယ်။
အမေရိကန်နဲ့အစ္စရေးတို့ဟာ အီရန်ရဲ့စစ်ရေးစွမ်းဆောင်ရည်တွေကိုလျှော့ချဖို့အတွက် အခုလိုလေကြောင်းပစ်မှတ်တွေကို ရွေးချယ်တိုက်ခိုက်နေတာဖြစ်ပါတယ်။
Boeing KC-747 ဟာ ကမ္ဘာပေါ်မှာအကြီးဆုံးဆီဖြည့်လေယာဉ်အမျိုးအစားဖြစ်ပြီး အီရန်ဟာဒီလေယာဉ်တွေကို လွန်ခဲ့တဲ့နှစ်ပေါင်းများစွာကတည်းက အသုံးပြုခဲ့တာပါ။
လက်ရှိမှာတော့ တေဟီရန်လေဆိပ်တဝိုက်မှာ လုံခြုံရေးတွေတင်းကျပ်ထားပြီး ဒီတိုက်ခိုက်မှုနဲ့ပတ်သက်လို့ အီရန်အစိုးရဘက်က တစုံတရာထုတ်ပြန်တာမရှိသေးပါဘူး။
