Border News Agency
နေပြည်တော်၊မတ် ၂၅။
DPLA၊ KNDF၊ PNLO နဲ့ PDF အဖွဲ့ဝင် စုစုပေါင်း ၂၇ ဦးဟာ လက်နက်ခဲယမ်းတွေနဲ့အတူ ဥပဒေဘောင်အတွင်း အလင်းဝင်ရောက်လာတယ်လို့ စစ်ကော်မရှင်တပ်က မတ်လ ၂၄ ရက်နေ့ထုတ်ပြန်ဝါဒဖြန့်ထားပါတယ်။
အရှေ့ပိုင်းတိုင်းစစ်ဌာနချုပ်၊သံလွင်ခန်းမမှာ ပြုလုပ်တဲ့အခမ်းအနားမှာ အလင်းဝင်လာသူတွေကို ဆုကြေးငွေကျပ် ၄၈၉ သိန်းပေးပြီး မိဘအုပ်ထိန်း သူတွေဆီပြန်အပ်ခဲ့တယ်လို့ ဆိုပါတယ်။
အဲဒီ တော်လှန်ရေးအဖွဲ့ဝင်တွေဟာ အချင်းချင်း ဗိုလ်ကျနှိပ်စက်မှုတွေနဲ့ အဆင်မပြေမှုတွေကြောင့် လက်နက်စွန့်လွှတ်တာလို့ ဆိုပါတယ်။
ဒါဟာတော်လှန်ရေးအင်အားစုတွေအကြား စိတ်ဓာတ်ပျက်ပြားစေဖို့ ရည်ရွယ်တဲ့ ဝါဒဖြန့်မှုသာဖြစ်တယ်လို့ ဝေဖန်မှုတွေ ရှိနေပါတယ်။
အဲဒီအလင်းဝင်လာသူတွေထဲမှာ အမျိုးသား ၂၆ ဦးနဲ့ အမျိုးသမီး ၁ ဦး ပါဝင်ပြီး M-16၊ M-22၊ Sniper၊ AK-47 အပါအဝင် လက်နက်ငယ် ၁၀ လက်နဲ့ ခဲယမ်းအချို့အပ်ခဲ့တယ်လို့ ဆိုပါတယ်။
ခုလို တော်လှန်ရေးအရှိန်မြင့်နေချိန်မှာ စစ်ကော်မရှင်တပ်ကအလင်းဝင်ပွဲတွေကို ဆက်တိုက်လုပ်ပြနေတာဟာ သူတို့ရဲ့ အုပ်ချုပ်ရေးယန္တရား ပုံမှန်ရှိနေသယောင် ဝါဒဖြန့်ချိနေတာသာဖြစ်တယ်လို့တော်လှန်ရေးအဖွဲ့တွေက တုံ့ပြန်ထားပါတယ်။
