Border News Agency
သရက်ချောင်း၊ ဧပြီ ၁။
တနင်္သာရီတိုင်း၊ သရက်ချောင်းမြို့နယ်အတွင်းက ထားဝယ်-မြိတ် ကားလမ်းမပေါ်မှာရှိတဲ့ အဓိကကျတဲ့ ဝင်းဝတံတားကို စစ်ကော်မရှင်တပ်က ပြန်လည်ထိန်းချုပ်လိုက်ပြီလို့ မတ်လ ၃၁ ရက်နေ့ကထုတ်ပြန်ပါတယ်။
အဲဒီဝင်းဝတံတားဟာ ပြီးခဲ့တဲ့ ဖေဖော်ဝါရီလ ၁၇ ရက်နေ့ကတည်းက တိုက်ပွဲတွေဖြစ်ပွားခဲ့တာဖြစ်ပြီး အဲဒီအချိန်ကစလို့ တံတားပတ်ဝန်းကျင်မှာ တော်လှန်ရေးပူးပေါင်းအဖွဲ့တွေက နယ်မြေစိုးမိုးထားခဲ့တာလို့ဆိုပါတယ်။
စစ်ကော်မရှင်တပ်က ဝင်းဝတံတားကို ပြန်လည်ရရှိဖို့အတွက် မတ်လ ၂၈ ရက်နေ့ကစပြီး စီတောရွာ၊ရေချိုချောင်းရွာနဲ့ ချောင်းဝပြင်ရွာအစရှိတဲ့ အနီးအနားပတ်ဝန်းကျင်တွေကို အဆင့်ဆင့် ထိုးစစ်ဆင်ခဲ့တယ်လို့ဆိုပါတယ်။
မတ်လ ၃၁ ရက်နေ့ မနက်ပိုင်းမှာတော့ ဝင်းဝရဲစခန်းဟောင်းနေရာနဲ့ ဝင်းဝတံတားနေရာတွေကို စစ်ကော်မရှင်တပ်ဘက်က ပြန်လည်ဝင်ရောက်တပ်စွဲနိုင်ခဲ့တာကြောင့် ပိတ်ထားရတဲ့ထားဝယ်-မြိတ် လမ်းပိုင်းကို ပြန်လည်ဖွင့်လှစ်လိုက်တယ်လို့ ဆိုပါတယ်။
အဲဒီလို လမ်းကြောင်းပြန်ပွင့်သွားတာမို့ကုန်စည်စီးဆင်းမှုတွေ ပြန်ရှိလာနိုင်ပေမယ့် နယ်မြေအတွင်း စစ်ရေးတင်းမာမှုတွေ ရှိနေသေးတာကြောင့် ခရီးသွားပြည်သူတွေအနေနဲ့ သတိထားသွားလာနေကြရဆဲ လို့သိရပါတယ်။
