Border News Agency
လယ်ဒို၊ ဧပြီ ၂။
ခလယ်လွီထူခရိုင်၊ လယ်ဒိုမြို့နယ်အတွင်းက စစ်ကော်မရှင်တပ်ရင်း ခမရ-၅၈၁ မှ တပ်သား ၁ ဦး KNLA ဆီလက်နက်ချအလင်းဝင်လာတယ်လို့ ကရင်အမျိုးသားအစည်းအရုံးက ဧပြီလ ၁ ရက်၊မနေ့ကထုတ်ပြန်ပါတယ်။
အဲဒီအသက် ၂၄ နှစ်အရွယ် တပ်သား မောင်ကျော်စိုးလွင်ဟာ စစ်ကော်မရှင်တပ်ရဲ့ အတင်းအဓမ္မ စစ်မှုထမ်းစေခိုင်းခြင်း ခံရသူဖြစ်တယ်လို့ဆိုပါတယ်။
သူဟာ မတ်လ ၂၉ ရက်နေ့ကမူးမြို့နယ်တောင်စုကျေးရွာမှာ အထိုင်ချနေစဉ်အတွင်း KNLA တပရင်း ၉ ဆီထွက်ပြေးလွတ်မြောက်လာတာ ဖြစ်ပါတယ်။
အလင်းဝင်လာချိန်မှာ K3 သေနတ် ၁ လက်၊ ကျည်ဘောက် ၄ ခုနဲ့ ကျည်အတောင့် ၁၀၀ တို့ကိုပါ တပါတည်း ယူဆောင်လာခဲ့တာကြောင့် လယ်ဒိုမြို့နယ် တာဝန်ရှိသူတွေက ငွေကျပ် ၁၀ သိန်း ထောက်ပံ့ပေးခဲ့တယ်လို့ ဆိုပါတယ်။
မိမိဆန္ဒမပါဘဲ အတင်းအဓမ္မ စစ်မှုထမ်းခိုင်းခံနေရသူတွေအနေနဲ့ နီးစပ်ရာ တော်လှန်ရေးတပ်ဖွဲ့တွေထံ လက်နက်ချအလင်းဝင်ရောက်ကြဖို့ ကေအဲန်ယူ-ကရင်အမျိုးသားအစည်းအရုံးက တိုက်တွန်းထားပါတယ်။
စစ်ကော်မရှင်တပ်ဖွဲ့ဝင်တွေဟာ ရှေ့တန်းစစ်မျက်နှာပြင်တွေမှာ စိတ်ဓာတ်ပိုင်းဆိုင်ရာ ကျဆင်းနေပြီး အခုလို လက်နက်နဲ့အတူ အလင်းဝင်ရောက်မှုတွေ ဆက်တိုက်ရှိနေတာလည်း ဖြစ်ပါတယ်။
