Border News Agency
ဘေရွတ်၊ ဧပြီ ၁၁။
လက်ဘနွန်နိုင်ငံ၊ ဘေရွတ်မြို့တော်ရဲ့ လူနေထူထပ်တဲ့ရပ်ကွက်တခုဖြစ်တဲ့ Corniche al-Mazraa မှာ အစ္စရေးရဲ့ လေကြောင်းတိုက်ခိုက်လို့ ပျက်စီးဆုံးရှုံးမှုတွေ အကြီးအကျယ်ဖြစ်ပေါ်ခဲ့ပါတယ်။
ဧပြီ ၈ ရက်နေ့ကဖြစ်ပွားခဲ့တဲ့ ဒီတိုက်ခိုက်မှုအတွင်းမှာ လမ်းပေါ်ကမော်တော်ယာဉ်တွေ အများအပြားမီးလောင်ပျက်စီးခဲ့ပြီး အဆောက်အဦးတွေလည်း ထိခိုက်မှုရှိခဲ့တာကြောင့် မြို့ခံတွေကြားမှာ ထိတ်လန့်စရာတွေဖြစ်ခဲ့ရပါတယ်။
အဲဒီပေါက်ကွဲမှုဖြစ်ပြီးနောက်မှာ လက်ဘနွန်မီးသတ်တပ်ဖွဲ့ဝင်တွေဟာ လောင်ကျွမ်းနေတဲ့မီးတွေကို ငြိမ်းသတ်ဖို့ကြိုးပမ်းခဲ့ရသလို အပျက်အစီးတွေကြားထဲကနေ ကယ်ဆယ်ရေးလုပ်ငန်းတွေကိုလည်း တရစပ်လုပ်ဆောင်ခဲ့ကြရပါတယ်။
လက်ဘနွန်နိုင်ငံတဝှမ်းအစ္စရေးရဲ့ တိုက်ခိုက်မှုတွေဟာ ပိုမိုပြင်းထန်လာနေပြီး အရပ်သားတွေနေထိုင်တဲ့ မြို့ပြဒေသတွေအထိပါ ရိုက်ခတ်လာတာကြောင့် ဒေသတွင်းပဋိပက္ခဟာ ပိုမိုကြီးထွားလာမယ့် အခြေအနေမှာရှိနေပါတယ်။
ဒီတိုက်ခိုက်မှုတွေကြောင့် ထိခိုက်ဒဏ်ရာရသူနဲ့ သေဆုံးသူအရေအတွက်ကိုတော့ အတိအကျထုတ်ပြန်ထားတာမရှိသေးပေမယ့် မြို့ပေါ်က ပျက်စီးနေတဲ့ ပုံရိပ်တွေအရလက်ဘနွန်ပြည်သူတွေဟာ စစ်ဘေးဒဏ်ကို အလူးအလဲခံစားနေရတာကိုတွေ့ရပါတယ်။
