Border News Agency
မကွေး၊ဧပြီ ၂၄။
မကွေးတိုင်း၊ ထီးလင်းမြို့နယ်မှာရှိတဲ့ စစ်ကော်မရှင်တပ်ရဲ့ အမှတ် ၂၄ ကာကွယ်ရေးပစ္စည်းစက်ရုံကို ဒေသကာကွယ်ရေး ပူးပေါင်းတပ်ဖွဲ့တွေက ရှော့တိုက်ဒုံးတွေနဲ့ ပစ်ခတ်တိုက်ခိုက်ခဲ့တာကြောင့် အဓိကစက်ရုံအဆောက်အဦ မီးလောင်ပေါက်ကွဲခဲ့တယ်လို့ အမျိုးသားညီညွတ်ရေးအစိုးရက ဧပြီလ ၂၄ ရက်၊ဒီနေ့ထုတ်ပြန်ပါတယ်။
အဲဒီတိုက်ခိုက်မှုကို ဧပြီလ ၂၀ ရက်နေ့မှာ မကွေးတိုင်း ပကဖ (SOU-3) နဲ့ တောင်ညိုနဂါးတပ်ဖွဲ့ (LPDF) တို့ ပူးပေါင်းလုပ်ဆောင်ခဲ့တာဖြစ်ပြီး စက်ရုံအတွင်း မီးလောင်မှုဖြစ်ပွားခဲ့တာကို NASA ရဲ့ Fire Map မှာပါ မြင်တွေ့နိုင်တယ်လို့ ဆိုပါတယ်။
အဲဒီကပစ ၂၄ ဟာ စစ်ကော်မရှင်တပ်အတွက် လက်နက်ကုန်ကြမ်းတွေ အရည်ကြိုပေးနေတဲ့ အဓိကထောက်တိုင်ဖြစ်သလို လက်ရှိမှာလည်း ထီးလင်း၊ ဆောနဲ့ ကျောက်ထုဘက်ကို စစ်ကြောင်းထိုးဖို့ အင်အားဖြည့်တင်းနေတဲ့ အဓိကစခန်းတခုလည်း ဖြစ်ပါတယ်
ပူးပေါင်းတပ်ဖွဲ့တွေရဲ့ တိုက်ခိုက်မှုကြောင့် ဧပြီလ ၂၃ ရက်နေ့မှာ စစ်ကော်မရှင်ဘက်က မကွေးလေတပ်က တိုက်လေယာဥ်၆ စီးအပြင် လက်နက်ကြီးတွေ၊ ဒရုန်းတွေနဲ့ပါ အနီးအနားကျေးရွာတွေကိုတိုက်ခိုက်မှုတွေ ပြုလုပ်ခဲ့တယ်လို့ဆိုပါတယ်။
စစ်ကော်မရှင်ဘက်က အခုလို လေကြောင်း၊ လက်နက်ကြီးတွေသုံးပြီး တုံ့ပြန်တိုက်ခိုက်နေတာကြောင့် ဒေသခံပြည်သူတွေအနေနဲ့ မြေပြင်သတိ၊ ဝေဟင်သတိနဲ့ ဂရုစိုက်နေထိုင်ကြဖို့ မကွေးတိုင်း ပကဖ က သတိပေးထားပါတယ်။
