Border News Agency
နယူးယောက်၊ ဧပြီ ၂၅။
ဒေါ်အောင်ဆန်းစုကြည် သက်ရှိထင်ရှားရှိကြောင်း အထောက်အထားပြသဖို့ တောင်းဆိုတဲ့ Proof of Life လူထုလှုပ်ရှားမှုကို အမေရိကန်ပြည်ထောင်စု၊နယူးယောက်မြို့မှာ လာမယ့် မေလ ၂ ရက်နေ့ ကျင်းပသွားမယ်လို့ NYCBC အဖွဲ့ကထုတ်ပြန်ပါတယ်။
အဲဒီလှုပ်ရှားမှုမှာ နိုင်ငံရေးအကျဉ်းသားအားလုံး ခြွင်းချက်မရှိအမြန်ဆုံး လွတ်မြောက်ရေးနဲ့ ဒေါ်အောင်ဆန်းစုကြည်ရဲ့ကျန်းမာရေးအခြေအနေကို စစ်ကော်မရှင်တပ်ဘက်က ခိုင်လုံတဲ့ အထောက်အထားပြဖို့ စုပေါင်းတောင်းဆိုကြမှာပါ။
ဒါ့အပြင် ဖက်ဒရယ်ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကော်မတီ (SCEF) ကို ထောက်ခံကြောင်း ပြသဖို့နဲ့ အကြမ်းဖက်စစ်ခေါင်းဆောင်မင်းအောင်လှိုင် ဦးဆောင်တဲ့ အာဏာသိမ်းစစ်အုပ်စုကို လက်မခံကြောင်း ကမ္ဘာကသိအောင် ဆန့်ကျင်ကန့်ကွက်ဖို့ဆိုတဲ့ ရည်ရွယ်ချက်တွေလည်း ပါဝင်ပါတယ်။
စစ်ခေါင်းဆောင်က ဒေါ်အောင်ဆန်းစုကြည်ကို ကောင်းမွန်စွာစောင့်ရှောက်ထားတယ်လို့ ထိုင်းနိုင်ငံခြားရေးဝန်ကြီးကို ပြောဆိုထားပေမယ့် သားဖြစ်သူ ကိုထိန်လင်းကတော့ မိခင်ဖြစ်သူရဲ့ အသက်အန္တရာယ်ကို စိုးရိမ်နေဆဲလို့ နိုင်ငံတကာမီဒီယာတွေကို ထုတ်ဖော်ပြောဆိုထားတာပါ။
အဲဒီ လူထုလှုပ်ရှားမှုကို နယူးယောက်မြို့ Foley Square မှာ ကျင်းပမှာဖြစ်ပြီး နယူးယောက်တဝိုက်မှာရှိတဲ့ တော်လှန်ရေးအင်အားစုတွေအနေနဲ့ လာရောက်ဝန်းရံပေးကြဖို့ ပွဲစီစဉ်သူတွေက ဖိတ်ခေါ်ထားပါတယ်။
